訂購 Herman Yeung 數學天書詳情

2015年7月25日 星期六

孫子算經 之 聯立方程







































Herman Yeung


連結 Link:   古文明系列

連結 Link:   Herman Yeung Blog 主目錄


2015年7月23日 星期四

孫子算經 之 圓面積



Herman Yeung


連結 Link:   古文明系列

連結 Link:   Herman Yeung Blog 主目錄





2015年7月21日 星期二

上門補習


2014-05-30

今天見到一個 Facebook 關於上門補習中介的 page
記得我中七考完 A-Level 後都有試過做相關的生意
整個流程係何等的幼稚,今日可以同大家分享一下,
當時我考完中七,當然係想搵個外快,
第一個諗法係幫人上門補習,
上門補習係可以搵一間中介公司幫忙介紹,
條件係第一個月的薪金的一半作為介紹費,
對於諗住做兩三個月的我黎講,這個介紹費比重太誇張了,
所以我第一個諗法係自己貼街招搵,節省一筆介紹費,
但慢慢覺得還掂做開,不如做埋介紹個 part
於是我同阿珊就計劃好一考完 a-level 就開始我們的計劃

我考完之後,先要找到導師,當時我地動用左幾十蚊,
印左一批街招招上門補習的導師,
當時貼街招唔算係犯法,而家就梗係要罰 $6000 啦,
我嚮我個區走好多個村,左貼右貼,
每張 poster 下面約四份一的位置
都會有 6 條細細條的聯絡方法,
方便人地撕下聯絡我地,
辛苦左一整天終於貼完,
第二天,我再經過相同的地方,發現好多都俾人地撕爛左
我心諗樹大招風,咁快就俾人破壞?
萬思不得其解,最後我發現原來我貼的時間
只係貼膠紙時嚮上四分一處貼左一條,
有興趣的人本來係想撕下面的紙條,
但由於貼唔實,一撕就撕到成張爛曬。

發現左呢個問題之後,唯有再貼過
今次要嚮下四分一的位置加多條膠紙
今次就真係成功,慢慢先先後後有三十幾個導師打俾我地
我地記低所有人的成績及意向嚮邊幾條村工作後就開始搵客
我地搵客好簡單,就係上門派傳單,
設計好傳單及 set 好價錢後就去影印,
咁影幾千張梗係要一段時間,等我地翻去取貨時,
原來個影印老細嚮度研究緊我地張野,
佢話佢女朋友都想搵人補英文,
就係咁,我地做到第一單生意,
利潤係大約我地的影印費。

呢支強心針令我覺得今次想唔上市都唔得,
我的邏輯好簡單,一張傳單 $0.2 (因為用彩色紙印)
成功介紹一單當係 $60 一小時,一星期當兩堂,
一個月八堂,四成的介紹費 
(為左有更好的導師,我地介紹費為四成),利潤約 $200,
當然如果介紹的係再高年級,收入會更高,
咁即係 1000 張傳單收一個就歸本,收兩個就賺。

我地印左3000張傳單,派一幢居屋,一梯 16 伙,38層樓高
一幢約 600 戶,先派 5 幢看看水溫 (當然係自己落手落腳派),
我的邏輯又黎啦,3000 戶不是人人都有小朋友,
當 3 戶有 1 戶有小朋友,而每 3 戶有小朋友的有 1 戶有補習需求,
而每 3 戶有補習需求的會有 1 戶搵我地,
今次應該有過百單生意,我怕做唔切,所以派 5 幢試試先。
終於......過左黃金 72 小時,來電是...... "0"
我曾經一度懷疑傳單印左電話號碼。

唔緊要,改變戰略,再印多 2000 張傳單,
等小學放學時派俾佢地接放學的家長,
第一次出擊雄心壯志,
去到事前計劃好的位置,由於唔太識路,
搵到個學校門口時已經放左學好耐,
Mission fail again

唔緊要,第二日再去,今次準時到達,
但原來係好多菲傭接或者無人接放學,
肯收我地傳單的只係極小數。
Mission fail again and again

唔緊要,再變陣,我地諗到家長會買送
嚮街市門口派一定中,
的確有好多家庭主婦出入街市,
但係佢地抽到一袋二袋,
無人有手接我地的傳單,
所以 Mission fail again and again and again

最終我地決定放棄,因為我地為左今次上市的 project
出左一個 8 字頭的號碼就黎到期,
諗住到左期唔續,所有野全線放棄,
就嚮呢個時間,終於有第一個家長打黎,
係教一個小五的學生,最後個單 job 係我自己接翻。

第一次創業係一個 滑鐵盧的戰役......
年輕人的有一股沖勁,今次的戰役我地損失的是汗水和時間,
賺到的是少少經驗,
相比現今世代,我地當時算是好彩,
今天的文化係 追夢 同野 乃野你可以有幾盡的時代
好多人就係一顆唔服輸的心,
可能碌咭 / 碌 daddy 張咭 (雖則成功靠父幹) 創業,
留下的蘇州屎卻好大獲。
所以有意創業的人,或者有意成就大事的人
奉勸各位,以上限 $1000 為資本,輸曬就好走了。

Herman Yeung


連結 Link:   Herman Yeung 的其他 Blog

連結 Link:   Herman Yeung Blog 主目錄


減肥


2014-05-21

近排聽到有中六的同學發現自己肥左
大家無需恐慌,因為呢個係正常的物理現象
小弟當年經歷兩個公開試之後,體重亦到左人生的最高點,
但一上大學一年級,我的體重係急轉直下,
何解?一切就要從我大學一年級的生活講起。

我大學一年級係住中大的新亞宿舍,
先講食方面,我記得第一日入宿舍,
我七點幾諗住第一日早少少食飯的時間,
canteen 竟然趨我食快d,原來佢係收8點,
即係你8點鐘食完野之後唔洗止意再食到野,
真係想食?你可以徒步下山,新亞要行落山其實都幾遠,
咁夜唔洗妄想有校巴,夜嗎嗎,一個人落山
先唔會講鬼神之說,更唔好講要行辮子路
(辮子路係一個鬼故的聖地,但由於時代太久遠,
大家其實都唔知佢正確位置嚮邊,
所以每一個師兄都會有自己一套的吹法,
故 "中大辮子路" 係無處不在)
淨係要過小橋流水已經夠危險,
(大家如果實地睇過,佢為左保持佢的自然感覺,
有唔少位置你係可以卜落一個幾層樓深的樹林中而應該無法上翻黎 
(係未真係上唔翻我唔知,因為我未卜過),
所以你未來或者而家讀緊中大的朋友,
可能會發現九月份有 100 個同學,點解畢業得翻九十幾個就係咁解。)
落到去如果火車收左,你仲要搭的士先可以到有好野食的地方
所以無咩生命危險,你都係選擇唔食。
我記得有一次我好夜先翻宿舍 
(我記得我仲搭到火車,所以夜極都係十二點幾左右)
由火車站上去新亞,人就一個都見唔到,
但係我途經一個運動場,
(所有中大學生都要上 體育堂,仲要兩個學期都要合格先可以畢業,所以有讀中大的都應該去過呢個運動場)
諗住入去飲水機飲啖水,一隻目露兇光的狗望實我,
我心諗飲水姐,你唔會咬我卦,我一行緊部水機,
佢就係咁吠,愈近就愈吠,
好漢不吃眼前虧...我呢條好漢最後都係飲唔到水。
幾經辛苦終於翻到宿舍,原來宿舍夜晚係會 lock 左
我啱啱入去住,鬼知咩?而要密碼即係入唔到啦,
唯有按鐘叫醒保安,最後當然係俾人醒左幾句啦,
但重點係個保安最後都係無俾到個密碼我。

呢d日子即係晚晚一係節食,一係勁做運動,兩者都係減肥
下學期,我都無再住宿,但接著就係每天都要上山落山的生涯
中大其實有校巴,但係校巴只會嚮你唔需要的時間出現黎串你
所以我三年大學都搭唔夠十次,每次都係用自己對腳行好過
上山落山要快當然係剷黎剷去,
我記得我當時係著有氣墊的 nike 波鞋
(唔係而家全氣墊,我地果陣後腱有氣墊已經係最勁)
行左九個月,鞋底穿左,唔係穿氣墊部分,
而係直頭穿到落雨會入水果隻,
咁無辦法啦,唯有再買對新,去買波鞋的鋪頭
連個 sales 都嘖嘖稱奇,
"呢隻鞋出左9個月你都可以行得穿﹗你行路上廣州呀﹗"
可見讀中大的運動量的確好誇張,
另老實講,一個運動量咁大的大學
竟然同一時間要求學生一定要 pass 兩個 sem 的 PE 課
會唔會玩野左 D,其他大學我唔知
但 理工大學的生活同我地係天壤之別,
佢地食 lunch 都可以去尖東 k lunch,
郁 d 又 tea buffet,佢地就係曹肥之旅,我地就係 鄭多燕之旅

但大家可以放心,呢個境況於二年級後會大大改善,
除左個人身體適應左,第二年唔洗上 PE 堂之後,
到左第二年,讀的 credit 會少左,
我第一年係讀 21, 21 個 credit,第二年已經係 15,18 個
你可以自己 pack 到翻四日,甚至有 d 同學走堂會變成翻三日或更少,
所以體重亦會開始谷底反彈,
而我的反彈路徑仲要一直延續至今天........
睇黎要減肥真係要翻中大讀多個學位先得

Herman Yeung


連結 Link:   Herman Yeung 的其他 Blog

連結 Link:   Herman Yeung Blog 主目錄


哥斯拉


2014-05-14

今天於 yahoo 中見到 哥斯拉 電影
仲記得十幾年前,我仲係中七定大學一年級時
亦都有做 哥斯拉,
果陣電影除左西片外係唔會有無位的情況
但出名的西片的確一上畫時都幾難買飛,
佢一上,我同三個朋友就想去睇
果次係我個 friend 買飛,
我︰咁難買你都買到飛呀,好野wo
friend︰係呀,仲要四個連位
我︰咁好,坐邊?
friend︰最後一行
但原來係我個 friend 睇錯左瑩幕的位置
我地坐的是第一行

當時個院好大,
第一行呢d握手位係要好似太空館睇戲咁向上望
否則你都只係睇到字幕果行
我地四個就抬高頭睇,
睇左好耐,條頸開始好痛,
當時的我最期待的係散場,
終於哥斯拉死左,我滿心歡喜,因為條頸已經痛到就斷咁滯,
就嚮呢個時間,男主角發現哥斯拉生的蛋
男主角嚇到流曬汗,而最明白個男主角心情的相信係我
因為我睇到都流曬汗,如果佢孵到出黎,我就有排都散唔到場,
....最後當然真係孵到出黎.....$#@$%@%@#
就係咁,我又要捱多幾個字先走得,
睇完果套戲的代價係之後成個星期都好似訓禮頸一樣﹗
所以哥斯拉嚮我心目中係比 "貞子" 還要恐佈的恐佈片﹗﹗

Herman Yeung


連結 Link:   Herman Yeung 的其他 Blog

連結 Link:   Herman Yeung Blog 主目錄


收視率


2013-11-21

最近收視率一事都算係一個好 hit 的話題, 
但其實佢亦都可以成為 DSE 的數學題, 
有關於 mis-use of statistics 統計的誤用。
大學時期,我曾經讀過一個關於傳媒的課程,當中都有教過收視率。
收視率其實係一個百分率去形容香港有多少%的人睇電視,
而根據果個課程中所描述,好耐好耐以前,
如果有一 d 劇集的大結局,收視可以去到 60 點以上。

如今次收視率 29 點就等如在 800 個 sample (樣本) 中, 
有 29% 的電視機睇無綫, 而 1 點佢係代表 6400 人, 
即係 100 點就等如 640 萬人
(可能設計這個收視率的時間,香港人口約 640萬),
而家香港有 700 萬人,但係唔係等如 800 個sample 的電視開曬, 
就代表真係有 640 萬人睇電視?

先唔評論有家庭係無電視、以及 800 個 sample 太少等問題,
大家可以想想一家四口,如果個阿媽開電視,
其實好多時家中的其餘三位成員係玩緊 ipad、打緊機、做緊功課, 
咁即係就算 100% 人開電視,實際睇電視的人都唔係 100%,
幾十年前,家中好少人有電腦,更唔好講有什麼 ipad、上網,
如果家中開電視,基本上家中的成員除左訓覺外,都係一齊睇電視,
但而家呢?你有幾何一家大小齊曬嚮度睇電視。

所以無綫每次講收視率之後所代表的觀眾數目其實係吹大好多。
所以電視廣告的效力是否真係咁大,
呢個一早已經俾 marketing 公司質疑,只不過一個願打、一個願捱,
唔少公司都認為賣電視廣告會令自己的品牌形象升 grade,
所以願意付出一個高昂的溢價,而一般網上平台的廣告,
好似阿豬阿狗都賣到,加上網上資訊向來都係供過於求,
所以即使做到相同效果,網上廣告的收費都係同電視廣告收費差天同地。
故好多人話叫香港電視轉為網上電視,表面上佢可以會吸納更多的觀眾,
因為網上睇片慢慢變成大勢所趨,
但廣告收入與無綫相比仍然係蚊髀同牛髀的關係。
在商言商,沒有足夠的收入來源,再有誠意都會因收入太少而倒閉,
所以香港電視要走向網上電視而又可以成功的機會率其實好低。

Herman Yeung


連結 Link:   Herman Yeung 的其他 Blog

連結 Link:   Herman Yeung Blog 主目錄


CFA


2013-11-19

2001年11月11日,911事件發生,
兩架飛機撞毀了世貿,亦撞毀了全球經濟,
大學有一個供就黎畢業的學生求職的平台(jijis),
亦一夜之間由 三百幾間公司 請人變成 三十幾間。
2001年年底,五大會計師樓之安達信會計師樓亦因為安隆事件倒閉。
雙重打擊下,中大專業會計系三年級的同學
由昔日每人至少有三間五大會計師樓的職位 offer
變成三個都無一個可以入職五大會計師樓
大家由目標入 5 大、改為 50 大、再改為 500 大、…

當時讀緊 Year 3 的我當然首當其衝,
想增加自己的本錢,我去報考 CFA (財務分析師),
呢個牌係一個認受性幾高的牌,分三個 level,
考第一個 level 的 basic requirement 係 degree holder,
佢係 7 月 1 日考,考試費好鬼貴,無記錯好似 7、8 千蚊,
但如果你早 9 個月報就可以平一半,
我嚮 Year 3 未畢業時報定,degree 證明後補的情況下報考,
之後用左 $6000 買左佢地 recommend 的書,
無記錯係由外國訂翻黎,有成十本八本,每本500版左右,
內容係好多個範疇,有股票、債券、衍生工具之類,
那時候沒有什麼 CFA 精讀買,你要由那數千版的書中學習,
好似連 Past paper 都買唔到。

7 月 1 日真係去考,果度係有齊考 level 1、2、3 的人,
要求極高,要你帶一個透明的袋裝鉛筆過去考,
果度好多人,多到直頭搵自己個位都要15分鐘,
入面有好多好大年紀的人都係考生,估計唔少係金融界的猛人,
果陣已經嚮度諗,如果有人恐怖襲擊考試個場地就真係好打擊香港的金融業,
如果香港一下子有幾千個金融業的從業員消失,
呢件事會係幾震撼。
最後?當然係咩事都無,我亦成功考過 CFA 的 Level 1,
成功後佢有張 cert 寄俾我,講明 七年內如果無法考埋 level 2 及3,
你的 level 1 會 expired。
之後我都無做金融業,所以最終都係 expired 左,
連買書及考試費,萬幾蚊就泡湯了….

之後由於搵食艱難,我又有考過保險牌,又有諗過考 CFP,
但最終我都係翻左大陸做一D唔關財務事的工作,
再之後直頭做埋教育界,我連會計果邊D年費都費事交,
正式結束呢D專業掠我水的日子。

年輕時的我,覺得自己好唔夠運,
人人讀專業會計都係前途無限,
恰好又遇上 911,入唔到 5 大 (後期變埋 4 大)
想加入 finance 個邊又處處碰壁,
轉轉折折直頭工作與商科一點關係都沒有,
而眼見身邊又有一些同學可以做到理想的職位,
真係既羨慕又妒忌,
但後來的金融海嘯,令當天夠運入到行的同學變得更不幸,
嚮海嘯後,我知道有當時幸運的人轉行至教育,
去左莊記度教,教左一年就無左佢個名,之後唔知佢去左邊。
有時諗翻轉頭,可能佢又好羨慕我
無浪費幾年時間嚮一個唔可以終身做的範疇中,
所以有時都真係要知足,珍惜今天所擁有的。
希望各位同學日後都可以有一條平坦的路行, good night ^^。

Herman Yeung


連結 Link:   Herman Yeung 的其他 blog

連結 Link:   Herman Yeung Channel 主目錄


倉頡


2013-10-08

好多年前我仲係中五學生的時代,
(考完會考無所事事的幾個月),
果年得 17 歲,所以無搵 (亦應該搵唔到) 暑期工,
嚮屋企自己學倉頡,
而家學倉頡可以有一萬幾千個方法,
而我當時都知道呢個世界上係有書教倉頡,
但係由於我太無野做,我用左世界上最慢的方法去學,
用一部 "快譯通" 字典機 (我諗呢件野你地去博物館先睇到) 黎學,
佢呢部野除左可以將英文翻譯中文外,
佢仲可以從中文解釋的文字中,逐隻字翻譯佢的倉頡碼出黎,
如是者,我好無聊地抄左好多版呢d字的倉頡碼出黎,
好似解密一樣逐隻逐隻估翻點解係呢個碼,
如是者,我可能係人類史上以最慢的速度學成倉頡。

當時我學倉頡係有理由,
因為早年最流行的 part time 唔係做 m 記、亦唔係做 馬會,
而係做 call 台,以前手提電話唔係咁普及,
我記得我同輩有第一個人有手提電話係中六果時,
果時佢有手提電話就好似話你知佢揸車翻學一樣,
唔係話佢好貴,而係你真係覺得佢拿住個手提電話做咩?
邊個會 call 佢?
你幻想下,當全香港得你一個有手提電話,
咁打俾你的人就係由固網電話打出,
一般我地同班的,都係同一個時段嚮條街度,
同一時段嚮屋企,如果大家嚮各自的屋企
我打你屋企得啦,如果同時嚮條街度,
我搵咩打俾你呀?
所以我果陣都忍唔住問佢,
你d分鐘用唔用得曬?
(果陣月費計劃係一個月打 100 分鐘左右)
其實佢都係用唔到一半。

唔好愈講愈遠先,講翻我學倉頡,
學倉頡的最主要原因係為左它日做 call 台
當然我其實都係為左日後升大學之後的 part time
學定一技之長,
但最後?到我真係升左大學,
所有 call 台的 call centre 已經搬曬去大陸,
唔會再有 call 台的工俾我做,
我學左成個月的技術得物無所用之餘,
我仲要聽到有一個新的發明出現
呢個就係 "聽寫王"
聽寫王就即係而家的聲控,
你講佢就會出字,
但當時佢的科技係好流,佢要你同佢講一大輪,
等個電腦熟習你的聲先可以出到啱的字,
即係你同佢講︰我去食飯
佢會出︰ 鵝__舌__
__係出唔到的位置,你要自己打翻,
呢個科技的失敗令我重拾自信,
我的倉頡能力似乎未被世人所放棄,
但係我又唔係做 call 台,
我的倉頡仲有咩用呢?

我第一次大派用場的時刻係我中六做學生會的時候,
唔知點解我會做左文書的職位,
我要負責打一篇好長好長的政崗,
唔記左幾長,
我打左幾個鐘之後,無 save 的情況下 close 左個 file

果次我深深體會到咩叫熟能生巧,
因為第一次打要成 5 個鐘,
我重頭打過只係 3 個幾鐘,
經歷果次的特訓,我發夢都記得點打 "學生會" 呢三個字,
因為過程打左幾百野。
你都知中學生的文筆,
永遠都係 subject verb object
學生會會為大家做 ____
學生會會提供 ___
如果我地能夠成為學生會,___
打到發狂。

到我升左大學之後,我聽講有一種 part time 叫打字幕
即係人地拍左套 90 分鐘的片,
你要跟佢地人的對話打翻d字幕出黎,
我其實都係聽,未做過,
但係聽講唔係好做,一套戲的字幕 $500
90 分鐘的對話,你要打可能係 5 個到 10 個 90 分鐘,
除翻開其實都係三四十蚊一個鐘。

之後好多年都無用武之地,
直到做左補習我先發現,
原來我咁多年前學的倉頡係為左翻同學 message,
原來我學的野真係有用,
而家如果我打字唔夠快,我相信我每天應該覆唔曬我的 message

有時我地學的野可能會好似無咩用,
但係可能十年後佢會好有用,
我中學讀理科但係大學讀商科
我都會覺得我中學讀 d 野無用,
原來日後做補習係用得翻我中學學的野。
我大學讀會計但係無做會計
原來我會計的知識可以幫到我自己成立公司
處理稅務問題
我大學學財務,原來係令我畢業早期沉迷炒股票以至損失天文數字奠定我斬手指戒股票。
一切的野都有用。
你可以話上天早有安排,所有野都係有安排。
你亦可以話你用腦不斷諗點樣發揮你識的強項將自己變得更強。

做人其實好辛苦,咩都要競爭,而家幼稚園都一位難求的年代,
我地根本無得揀,做男同學的更加要爭氣,
為自己的前途加把勁,
加油﹗ 日後有成果之日,你就會覺得你今天的努力係值得。

Herman Yeung


連結 Link:   Herman Yeung 的其他 blog

連結 Link:   Herman Yeung Channel 主目錄


人壽保險


2013-08-30

剛大學畢業時,因為經濟極為不景氣,
我都諗過做保險,唔係得個諗字,
我係去左英國保誠讀過一個賣保險的牌照,
如果唔係過左期,而家我都可以賣保險。
讀書時有提及過一個叫"可保利益"
即係你買保險要有一個可保的理由,
例如你為你的汽車買保險,賠償上限無可能大過你架車的價值,
否則人人都買完車就撞車,
除皮後仲有錢賺就真係日日都有交通意外,
所有的保險項目都有一項咁的原則,
但到左人壽保險就好難實行,
人命何價?某人死後對在生人的損失有多大?
除了客觀的損失,心靈上的損失又點計算?
所以人壽保險上要評估可保性有點困難,
但都有少少原則,
例如︰投保人與受益人一定要有某程度上的關係,
即係你唔可以將一個三九唔識七的醫院病人投保,
如果唔係,成個情況就好似賭波咁,賭個病人幾時死,
除了道德的問題外,
佢都會怕你會因利益而用方法令某些人早 d 死。
除此之後,一般人壽都係限左一年內不可以自殺而獲賠償,
佢都係唔想係人想自殺都去撈一筆,
呢個都係一個好重要的條款。

咁如果你同投保人沒有關係,
你可唔可以做投保人、受益人的關係?
根據我讀書時所學,係可以的,
例如我開公司,公司內有一個員工簡直係曠世奇才,
好比臥龍鳳雛,你係可以為佢條命投保,
但你要証明到佢一死你公司會帶黎幾多的損失,
所以公司可以為一些極高層員工投保,
日後大家如果成為公司中的猛將,你老細都會為你投保,
但你唔好咁開心,
一. 賠款不是賠俾你或你的家人,係賠俾公司,
二. 如果你老細一下等錢駛,而你又好似好長命咁,
佢可能會動腦筋縮短你的壽命。

其實人壽保險某程度上係一種賭博,
用自己條命為骰仔,
你買自己短命,而保險公司買你長命百歲,
如果你買中保險公司就輸,相反就係保險公司賺,
遊戲就係咁簡單,
但係如果我想買自己長命呢?
其實世界上係有另一種產品可以俾你買自己長命,
呢種叫年金,香港好似未見過但外國就有,
你一筆過俾曬副身家保險公司,e.g. 1000 萬。
佢每月俾翻一個數字你 e.g. 10 萬。
俾到你死果日,如果你一投保就 __ 左,
保險公司賺曬,但萬一邵逸夫投保,保險公司可能會賠突好多。
咁保險公司咪好驚?
唔驚,保險公司會有一個叫精算師的人,
會幫佢地計保險公司自身的風險,
一百個投保人,有幾多個係邵逸夫,
賺 99 個賠一個 9999 千足純金可能都有賺,
而如果精算師發現唔係 wo,個個投保人都係姓邵,
佢就可以將自己的生意再向一 d 世界級的保險公司作再投保,
即係話如果咁好彩 100 個都人瑞,
佢的賠款會由世界級的保險公司賠,
相反,佢就要將部分的利潤送給那間世界級的保險公司。

而世界級的保險公司又會唔會驚?
如果世界所有國家的保險公司之客戶都係人瑞,
佢的確要賠通莊,但係果陣應該係世界人口爆炸的年代,
世界應該會出現前所未有的極大蕭條,
只要佢嚮世界的股票市場中作適量的沽空,
真係出現億萬份之一的情況,
佢都可以及時有所對沖,
所以其實所有野都係互相牽制,
只要合理地將風險分散,
你唔會係賺得最多果個 (因為對沖係要成本)
但你都唔會係輸得最金果個。

http://hk.news.yahoo.com/私生b女窒息亡-婦被控呃保險-224020169.html

Herman Yeung


連結 Link:   Herman Yeung 的其他 blog

連結 Link:   Herman Yeung Channel 主目錄


打風


2013-08-14

又打風了,記得好多年前,
我果緊係讀緊大學year 1,
住左嚮中大新亞宿舍。
夜晚都仲有三號風球,
天文台仲話第二日改掛更高風球的機會不大,
我地就梗係信天文台,諗住第二朝都係要翻學,
點知訓到第二朝好早(我諗6、7點左右) 就有師兄拍門,
"喂﹗十號風球啦,好多間房d窗都爆左,你地間房有無事?"
真係一言驚醒夢中人,原來我地間房已經勁入水。
講到呢度真係要形容下好多年前的宿舍情況,
果陣雖然已經有冷氣的發明,但唔係幢幢宿舍都有冷氣,
小弟果幢就係無呢個先進的發明,
d窗好流我都知架啦,係估唔到十號風球會入水je。
我地醒黎,d師兄幫手將床板係咁兒頂住個窗,
我地就徹離自己的單位去宿舍大堂,
宿舍大堂係一個大約有十幾部電腦的電腦室,
大家當時係無智能手機、Facebook,
互相聯繫係用一個叫 icq 的系統聯絡,
你嚮大廳到會不時聽到用緊電腦果班人大叫
某某宿舍單位又爆左窗、某某宿舍單位"畢水"已經畢唔切,
好似打緊扙咁,
你話大家想唔想走?梗係想,
但係我地地處山上 (新亞係好唔近大學站)
要徒步落山平日都要十五分鐘 (講緊急步)
仲要係十號風球,加埋中大樹木眾多,
而十號風球已經令大部分的樹訓低阻住條路,
要下山仲難過少林寺下山。
而最慘係,我地宿舍只有一個小賣部,
叫得小賣部就梗係好小野賣,
我這個難民只係過程中搶左汽水機中3罐咖啡就咩都搶唔到,
諗翻自己都幾白痴,已經得翻兩個私伙杯面唔夠野食,
仲要隊幾罐咖啡落去驚死自己唔胃痛。
好﹗又講翻個戰況,我記得果日宿舍個看更落曬閘堆曬沙包之後,
有三個死仔話要落山,看更梗係火都黎 (因為佢要搬落 d 沙包),
佢話︰"外面好危險,你係要出去就唔好翻黎"
因為翻黎佢又要搬沙包。
果三個死仔︰"我係要出去,一定唔會翻"
就咁我地就睇住佢地一去無返......(中大又一鬼故)
其實可能佢地翻左屋企je。
再到下午,我親身經歷咩叫風眼,
我地地勢極高,吹到好大聲,但又真係吹吹下會突然無曬風,
再過一段時間,再起風已經係吹另一邊,
我到左下午終於頂唔順,家人安排到車我就走左。
之後翻宿舍,個窗爛成咁當然係找維修,
但維修隊話你的損毀不太嚴重 (只係勁入水),沒有即時的危險,
所以會排程於好後先會維修,終於我 quit 宿佢都無整到。 =.=

Herman Yeung


連結 Link:   Herman Yeung 的其他 blog

連結 Link:   Herman Yeung Channel 主目錄


傳銷


2013-08-29

就黎九月二日,大學、大專的同學要留意以下警訊的內容︰

香薰傳銷︰
你只要用 9000 蚊就可以入會,
只要你可以搵到多 8 個水魚又用 9000 蚊入會,你就會得到9000 bonus,
再多 8 個水魚?你就可以賺 9000,
而你搵的水魚如果又搵到水魚,
你又有得分,咁就發啦,個個都唔益剩係益你一個。

咩呀?無咁多錢,唔怕,你有信用咭嘛,你可以 “look” 錢出黎,
兩野就賺翻啦。
好好好,你 9000 蚊入會,咁我真係要介紹一個伯爵會員計劃俾你,
你俾 9 個 9000 蚊,你就可以成為伯爵會員,
我地老細路易 14 會親自封你為伯爵,
之後你的回報仲會有好可觀的升幅。
咩呀?無咁多錢,唔怕,有安x兄弟嘛,我識人,介紹你去借,
一年都唔洗36厘息,好兄弟先介紹你呀。

到你過左數,你就會發現你已經係香港最後一個水魚,
無新水魚的話你的錢就唔會有回頭,
等多兩個月路易14仲會走埋佬,
如果你過程中搵到三幾個水魚的話,
你就要追斬點你的老千同埋俾個幾個水魚追斬。
而家佢地仲會話你知我地唔係老千,老千果個係香薰傳銷,
我地係香蕉傳銷,好唔同架,其實咪又係果班人。
大家真係要小心小心。

而家騙徒其實都係利用人類跟紅頂白的心態,
佢地的門面一定會做到好靚,金壁輝煌,
令你覺得今次唔同架啦,人人白痴我獨醒的境界。
大家要明白老千眼中唔怕你精唔怕你呆至怕你唔來,
佢會有昆一千人的經驗但斷估你中老千計都唔會有一千次掛。

好耐以前我都聽過有些同行都係利用同學想入我們這一行的心態,
掛名會將同學帶入行,實情係利用他們做廉價勞工甚至義工,
又或者老昆 d 學生話只要報曬佢所有課程而攞到咩成績,
佢就會傳位給你,當中被老點的仲要係我表弟。
好笑的事,佢表哥做緊呢行佢唔問我,
竟然信第二個所謂的天皇?最終當然是走數啦。

最終都係果句︰便宜莫貪,真係要貪,
第一. 唔好借錢去貪,因為咁隨時令你一身蟻,
第二. 唔好以為做義工最多都係浪費時間,
大專、大學時期的光陰非常重要,
讀好自己本科日後前途更好,回報更高。

Herman Yeung


連結 Link:   Herman Yeung 的其他 blog

連結 Link:   Herman Yeung Channel 主目錄


股票 vs 估票


2013-06-30

講永遠都係好浪漫,
但事實上呢?你問下香港有炒緊股票 或 有炒過股票的人
相信 95% 的人都係輸,仲要有一半係勁輸,
銀行佬會成日利用通脹呢個point 昆你買投資產品,
話要5%以上的回報先可以令自己的錢不致於貶值,
但 風險 vs 回報 本來就係正比,
你想爭取更高的回報之代價就係付出更高的風險,
要風險就係你的本金有機會不是增長 5%,而係得翻 5%。
十年前我讀會計,炒股票係講 P/E,
係講一隻股票的盈利多少推算股價的走趨,
而家?可以話係無邏輯可言,
細心聽下股票分析員的推介,
你就會發現佢地每星期推介十隻八隻股票俾你,
幾個禮拜後,將升左果幾隻用黎自吹自擂,
輸左果幾隻?佢會當自己無講過。
曾經有個統計,將
股票分析員的預測賽果 VS 風水師的預測賽果 VS 實際賽果
發現,風水師的預言命中率 同你亂估的命中率 相同
股票分析員的預言命中率 比 亂估仲要差。
咁即係話你真係要買股票的話,
你一係信風水師好過股票分析員,
或者聽股票分析員的報告之後倒轉黎買,
即係7叔話升你買跌,長久下你應該賺多過蝕,
但你唔好咁開心,命中率不等如回報率,
你賺三次輸兩次,你的結果都係輸,
你諗下你賺三次 5 成,輸兩次 5 成,
你的本金就係 1.5^3 X (0.5^2) = 0.84375
最後你都係輸,
所以我覺得香港的發達方程式就係一世唔買股票,
俾心機讀好本書,做好自己本份,賺到 D 錢就算放響屋企,
當人地於股災中勁蝕三次而唔關你事,你已經贏曬。

Herman Yeung

http://hk.finance.yahoo.com/blogs/simon-lee/別讓口袋裏的金錢偷懶-044632581.html



連結 Link:   Herman Yeung 的其他 blog

連結 Link:   Herman Yeung Channel 主目錄


暑期工


2013-05-09

近日見到唔少中六的同學考完試都去搵暑期工做,
回想以前我中七同大學一年級都有做過暑期工,記憶猶新。
我中七果年,啱啱香港經歷完金融風暴,
香港的經濟仍然疲弱,想搵份暑期工做下都唔係咁易,
當時得到親戚的幫忙,成功入左某大機構做 sales,
做的是家電部,仲記得當時我係第五營。
一入去聽到第五營,好似去左參軍咁,
原來第五營的意思係第五組營業隊伍咁解。
入面有 6 個 sales,好幾個 admin staff 同埋 6 個工程的人,
兩個上司,好多個高層,人事都幾複雜。

當時我的任務係為客戶做產品介紹,簡單黎講,
有學校、醫院、政府機構想買電器,
佢就會出一張叫 tender 的物體,或者電話查詢我地,
我地就要按佢地的要求,配對翻合適的產品,
例如一間學校要十部兩匹的冷氣機,廿部風扇,一個微波爐,
咁我就要找回相關型號,報價給他們及 fax 相關的 catalog 俾佢地,
如果佢地真係落 order,我地就要為佢地安排出貨。 
表面上係一個幾簡單的工作,
但實際上我的崗位最主要係 “俾人鬧”。

事關人事當中不同的阿頭各自勾心鬥角,
我幫 A 做野,B 就會俾說話我聽,我幫 B 做野,A又會醒我。
我幫客問倉有無貨,一話我係跟阿B做野,
佢地就唔會報俾我聽 (因為 B 得罪左佢地)。
想問 showroom 攞最新產品 catalog,一知我係第五營就話派曬,
安排左出貨但物流又會放飛機,
而最後俾個客鬧的當然仍然係小弟 … 
上司又會無啦啦走黎問你跟緊d咩,
我記得果時 OK便利店同我地公司買100部微波爐,
我阿頭一知道就話大生意黎 ga wo,要佢簽張合約先肯出貨 orz 
再大單的生意都唔洗咁做,點解要改制度,
佢地真係隨心所欲,之後我又要同個客講翻新的要求,
最後當然又係俾個客鬧。
又記得一次幫個阿頭打份合約,打左成個鐘又無 save,
居然有條工程部的友仔無啦啦息左我果邊個電掣,之後就行左去,
又要我重新打過,十分鐘後我阿頭問我打好未,
我話未,又俾佢 &%$$##$^…
大體上黎講,我兩個月就係不斷俾人鬧咁渡過。

兩個月的暑期工學左D咩,就係不斷俾人鬧。
你做錯你俾人鬧,你上司做錯你又會俾人鬧
無人做錯,你都可能會俾人鬧… 
成個過程因為你係最細所以不斷要俾人鬧。
但我回想翻轉頭,我真係好多謝佢地,出黎工作本來就係咁,
唔單止要識做野,仲要識做人,
而人工的其中一部分就係俾人鬧同埋食死貓,
年輕的我無咩所謂,因為我真係最低級的一員,
沒有工作經驗亦幫唔到佢地咩大忙,而當時經濟咁差,
我都可以有 $7000 一個月算係一份好唔錯的暑期工,
亦因為我成日都夾嚮客戶同送貨中間,
我都開始學識一 D 語言上的藝術,點樣可以俾人鬧少 D,
這個技術間接令我日後大學畢業搵到第一份工,成就了今天的我。

我講呢堆野係因為見到唔少同學抱怨自己份暑期工無野學,
成日俾人鬧,我覺得呢兩句係有矛盾。 
俾人鬧咪就係學緊野 law,人地鬧你係因為你有弱點先俾人鬧,
係一個機會知道自己的弱點。 
有人可能覺得成日俾人鬧好無癮,如果你真係咁唔鐘意俾人鬧,
咁我就強烈建議你唔好讀 marketing,
marketing 的開頭就係 sales,要做一個sales,
未學 sell 野,就先要學俾人鬧,
 “顧客永遠是對的” 係咩意思,
意思係你老細要你就算俾人鬧都要 sell 到個客翻黎咁解,
所以你薄皮的不如做會計,
BBA 這個詞語大浪漫,人人以為可以利用 BBA 的知識輕鬆致富,
其實真象係成功的人背後係付出了好多血汗換翻黎。
輕鬆致富只有一個行業,就係二世祖,
問題係你有無先天條件做這份職業。

要成功就要付出,讀書又嫌悶、做野又嫌辛苦,
就等如你嫌錢腥一樣。
中四、五的同學俾心機讀書,中六的同學搵到暑期工俾心機做,
搵唔到暑期工的就搵D野認真學下,充實下,加油。

Herman Yeung


連結 Link:   Herman Yeung 的其他 Blog

連結 Link:   Herman Yeung Blog 主目錄


歷史循環


2013-01-20

早幾晚,工作至夜闌人靜的時候,
突然諗起一d中國歷史的故事,
特意走去找找些資料,一找之下,
原來好耐之前香港電台RTHK 有一個節目係講中國 5000 年歷史,
由傳疑時代至民國 5000 年裡面所發生的事,
用廣播劇的形式 present 出黎,非常過癮,
我一路出 mock,一路聽了好幾個朝代,
但發現唔知係唔係大家四字詞語貧乏,
個個朝代的第一代君主都係勤政愛民,
而最後一代君主都係酒池肉林。
歷史循環又循環,重覆性緊要過考試局的出題,
國家的問題一代炒完又一代,
呢d就係所謂的歷史教訓?
所以我覺得如果君主係信佛,邏輯上佢一定唔會亡國,
佛家中人戒酒戒肉,何來酒池肉林,
仲有我唔明點解d末代君主咁變態,
將成個樹林都掛曬豬肉,佢未做皇帝之前一定係豬肉佬。 

言歸正傳,其實聽左咁多的歷史故事,
只係有一個的得著,就係歷史係循環的,
個個朝代所發生的事大同小異,
成功、失敗的理由亦係大同小異,
其實個世界應該好易玩,就好似經濟一樣,
經濟學家話經濟是有週期,景氣 --> 衰退 --> 蕭條 --> 復甦,
像四季的變化,循環不息,但這些定律總係會有人挑戰。

1999年,大批美國科技股上市,
上市數量多到當時的美國要建立一個叫納斯達克指數係專門為科技股作指標,
而香港梗係跟都跟唔切,做左個香港納斯達克指數,
即係而家的創業版。
當時科技為經濟帶黎豐厚利潤,
當全人類為科技所帶黎的財富而瘋狂時,
有人話經濟週期理論已經過時,科技為人類帶黎無限可能,
即係科技會帶領人類進入永垂不朽的經濟景氣,
經濟循環正式改寫。 

他們如此瘋狂,理由是 internet 的盛行,
internet 為商人提供無限商機,沒有地域的限制,
他們好容易就接觸到全世界的買家、用家,生意滾滾來。 

可惜,2001年科技股爆破,一切好夢成空,
所有野都要還原基本步,為何會失敗?
為何沒有永垂不朽的經濟景氣?
原因係當時人類正面地覺得 internet 會為他們帶來無限買家,
但其實同時亦帶來無限的競爭者,
美國的商人的確可以賣野俾中國、印度、西班牙的人,
但同時中國、印度、西班牙的商人亦加入了這個大戰場提供貨品、服務給美國的客戶。
當需求和供應都增加,財富其實沒有多到。 

而當時有一個新興的生意叫 "入門網站",
"入門網站" 就係上網時經常去的網站,
有人流就有廣告收入,這個新收入的估計利潤是天價的,
當時入門網站的生意好多人插手,
當中包括有 hongkong.com, sina, yahoo, 
其實仲有好多好多,他們看準這個生意投資好大,
但結果呢? 
internet 隨了帶左好多競爭者,亦同時帶了好多義工入黎,
何謂義工?
有好多人建立網頁並非為牟利,而係為興趣,
佢地的 effort 及 output 有時仲好過好多大型網頁,
令當時的入門網站並非得到想像中的人流,
廣告收益亦遠遜預期,導致虧損累累。
到今天仲有無人會記得 tom.com, hongkong.com, sunevision 係咩?
當時呢幾間公司投資額係十億計。
最後剩翻的只係 yahoo 係成功。 

科技股爆破後,一切又係歷史的循環,
傳統生意的公司主導翻大市上落,
之後又係新一輪的經濟週期,
這個故事又再一次證明歷史根本就係循環不息,
香港的尖沙嘴永遠都係香港的尖沙嘴,
無論環境點變,可能一切的循環都係無變,
香港地仍然係咁實際,學歷換取機會、機會換取金錢。 
有同學問過我,而家大學生出黎都搵唔夠買樓,
咁讀書黎做咩?
我只可以講,讀得好未必會發達,
但一定比讀得唔好多機會,
今天大學生同文盲都係買唔起樓,
他們大氣候改變,大學生就可以得到佢地應得0既野,
勤力的人一定會有回報,反正歷史係循環。

有報紙話樓市長升長有,
但我記得 1997 年金融風暴前夕,
報紙都係話股市長升長有,最後就係股災。
而股災唔可怕,錢蝕了好多人都可以再賺回 (當然之後可能再蝕翻),
而最可怕的是當 1997 年股市全盛時,
好多學生自以為股神紛紛退學轉全職炒股,
最後呢,個個咪變曬全職蟹民,
人的學歷才是能永恆令你保證競爭力的工具,
無論經濟情況如何,大家要加油讀好本書,
日後才可以渡過一個又一個難關。

Herman Yeung


連結 Link:   Herman Yeung 的其他 Blog

連結 Link:   Herman Yeung Blog 主目錄


失業率


2013-01-07

如果根源性的數據都係錯,所有的相關分析都是廢的,
例如什麼股票分析員可能會話︰
由於失業率低左,市民消費意欲強而建議買入零售股,
這個結論是老點。
如斯兒戲的分析結果,於每天財經節目中發佈,
卻引來好多人睇,
大家都渴望從那些專家口中得知內幕消息的同時,
有無諗過,如果佢地真係咁勁,點解佢地唔自己買?
自己買,一變二、二變四、四變李嘉城呢個公式好直接,
洗唔洗公諸同好,有錢大家搵?

以前讀大學時,我讀過一個叫 FSA (Financial Statement Analysis),
中文即係財務報表分析。
未讀這個 course 之前,
表面上這個 course 是學如何分析一份財務報表,
如果看那間公司的前景、現金流、資產負債比例之餘。
但一讀這個 course,
原來佢係教如何製造一個誤導其他分析員的財務報表。
道高一尺、魔高一丈,原則上有人學點睇報表,
就有人學點做假報表誤導睇的人。
有人學點計稅、就有人學點逃稅、
再有人學點 check 呢班逃稅友、再再有人學點樣避開佢地的檢控。
原則上就係一班同門師兄弟的大鬥發,
PAC (Professional Accoutancy) 大戰 PAC。
慢慢地你就會發現,這個世界係幾咁唔可靠,
什麼大行報告、政府刊物,所發放的資料都係老點
最終如佛家一句話,本來無一物、何處惹塵埃。
本來就係無 financial statement,有人想知上市公司的情況,
就要求佢出 financial statement,但又有人會造假,
咁睇左 financial statement 的人係唔係代表對呢間公司的情況更了解?
最終你會發現睇左有時仲衰過無睇,
學過商科炒股票可能仲衰過個師奶。

http://hk.news.yahoo.com/統計處調查涉造假-前線員工爆料-學者質疑失業率可信度-211415657.html

Herman Yeung


連結 Link:   Herman Yeung 的其他 Blog

連結 Link:   Herman Yeung Blog 主目錄


閏年


2013-01-02

今日睇左篇新聞講今年的農曆曆法。 
無聊走去搵 d 相關的資料, 
發現原來西曆的曆法好得意。 
據我地的知識當中,西曆係有閏年, 
即係 4 的倍數的年份的 2 月會有 29 日 
比平時多出一天,
呢個好多人都知, 
但大家 (連埋我未查資料之前在內) 未必知係, 
原來 100 的倍數年係唔會閏年, 
即係 2100、2200 年應該唔會閏年。 
而如果 佢係 400 的倍數就要閏翻。(所以 2000 年時其實要閏) 
但如果佢係 4000 的倍數又唔洗閏。 

何解? 
因為一年其實有 365.2422 日,而唔係 365 日 
所以 4 年一閏就係補回那些多出黎的時間, 
計計數,如果真正一年係 365.2422 日, 
而西曆係 365 日,咁西曆就少了 0.2422 日 
四年就少了 0.9688 日,四年一閏就會追回差價, 
變成多了 0.0312 日。 

如是者 100 年後,就經歷 25 個四年,西曆就會多左 0.78 日 
所以 100 的倍數又要唔閏,令其真正為 少左 0.22 日 
咁 400 年之後呢,就經歷 4 個 100 年,前後就少左 0.88 日,
所以每 400 年又要閏翻,令真正係 多左0.12日 
咁 4000 年後呢,就經歷左 10 個 400 年,前後就少左 1.2 日, 
所以又要唔鬼閏,令真正只係少左 0.2 日。 
呢條數沒完沒了,
因為要求出年和日的 L.C.M 係一個好大獲的事。

 一年的真正日數為 365.242199074... 日, 
無盡小數好大獲,就算唔係無盡,當真係 365.242199074 日,
即係年年當 365日,
而 10 億年,就利用閏年黎補回 2 億 4219 萬 9074 日,
條數先啱翻。 
當中就算有人計得掂,大家都用唔到,
因為要 10 億年先可以有一個 cycle, 
以而家過三、幾個月就話有一次世界末日的世界裡, 
無咩人有興趣 10 億年後發生的事, 
再講,所有所謂的曆法都係以太陽月亮為依歸, 
10 億年後,這個宇宙仲有無太陽?
又或者當時的人類可以已經離開太陽系, 
到左靴文陽系,
到時一年的日數甚至一天的時數可能都會改寫了。 
所以唔好講咁遠,
我地第一次面對4的倍數年又唔洗閏年就係 2100 年, 
我果時都係 120 歲,而大家都係一百零幾歲, 
到時要睇下出年曆果個有無出錯先。 
2100 年 2 月 28 日約定您。 ^^

Herman Yeung


連結 Link:   Herman Yeung 的其他 Blog

連結 Link:   Herman Yeung Blog 主目錄


默默耕耘難搵錢?


2013-01-01

啱啱睇到呢篇新聞,
講有人靠地產致富,仲話 "默默耕耘難搵錢"
之後睇埋樓下的回應,90% 都係話佢太曬命之類,
而我只是想從數學的角度去分析呢個個案。
如果篇報導沒有失實的話,
這位炒樓王係於 2005 年利用 20萬的本金炒炒賣賣,
至今佢自稱有 1000 萬,即係升左 50 倍。
為何那麼快,原因在於地產有槓桿。
何謂槓桿?
物理上的槓桿原理係話用好少的力可以抬起好重的物件就叫槓桿。
但財務 finance 上的意思係你可以利用財務的方法,
將利潤回報率放大就叫槓桿。

舉例︰我用 100 萬買一件貨,再用 120 萬賣出,賺率為 20%。
但我改用 100 萬 + 900萬銀行貸款買十件貨,
再用 1200 萬賣出,之後還翻 900 萬俾銀行,
整個過程就會變成 100 萬本金、300 萬回籠,賺率為 200%。

地產就係這個例子,你買樓要俾的只係首期,
香港若處於太平盛世,一般最盡可以做九成按揭,
即係銀行借九成錢給你,你只利用一成資金就可以買樓。
這個安排就會令你買賣樓時出現賺率的槓桿,20%的賺率會變成 200%,10倍的情況。

即係以新聞主人翁的情況,佢只要每一次買樓後升 27%,
佢就可以有 2.7倍的回報,這些交易做兩次就 2.7x2.7 = 7.29倍,
做三次就可以有 2.7x2.7x2.7 = 19.683倍。
做四次呢就已經係 50 倍的回報,佢就可以做千萬富翁。
7年內要做到 4次這些交易,對於呢幾年香港的樓市黎講的確唔難。

咁咪幾好賺﹗﹗
大學時期的我都曾經覺得呢個世界的錢真係咁好賺,但實際呢?

這個原理無械可擊,但當中一旦有任何差池就死路一條。
何解?
槓桿原理係一把雙刃刀,賺錢時會令你賺更多、蝕錢時會令你蝕更多。
以我之前的例子,
我用 100 萬買一件貨,發現最終只係賣到 80 萬,蝕率為 20%。
而我仲有 80% 的本金可以再做生意,一切都仲有機會。
但我改用 100 萬 + 900萬銀行貸款買一件貨,
發現最終只係賣到 800 萬,之後就會發現無力還錢俾銀行,
整個過程就會變成 100 萬本金、變成陷入 100 萬的負債。

負債當然要還,千祈唔好信破產四年後又係一條好漢的講法,
破產四年後,如果債權人放棄對你的追擊,你就係一條好漢,
但如果佢四年後再洗錢追擊你,
你就要多等四年,四年之後又四年、四年之後又四年,
其實追索權係無限,所以破產解決不了個問題。

咁即係要還錢啦,如果要還錢你就要靠你自己雙手去賺,
學歷高的會有較高的賺錢能力,還款期就可以短d,
相反可能還十世都還唔曬。呢個就係真象。

今次的主人翁非常幸運,當中多次的交易都未有損手,
才能有幸接受訪問,但萬一行運一條龍的某一刻,
市況逆轉就會好大獲。

有人會話,升就獲利,萬一跌咪持貨唔放。
呢條橋係唔 work,之前講過,你係問銀行借九成錢去做買賣,
銀行肯借錢俾你係基於兩點,
1.  你的資產價值高於貸款,萬一你走佬,
     佢都可以賣左你的物業吐現,銀行都唔洗輸。
2.  你的還款能力,除了資產價值高於貸款外,
     佢都會睇你的收入能否支持你的還款,
     即係你每月還款不能高於你的每月收入的一半,
     否則你實斷供,到時又係一個壞脹。
所以當市況差時,你的樓價跌超過一成,銀行就會向你 call loan,
即係叫你補倉,100萬的樓,銀行借90萬俾你,
你樓樓跌到 89 萬 9999,銀行就會話你知,
你要補倉9萬先可以繼續貸款計劃,
如果你話無錢?咁佢就會斬倉,
於市場中以最短時間沽出你的物業。

咩叫最短時間?就係以銀主盤形式拍賣,
到時叫十個八個二打六黎競投你層物業,佢地知銀行必賣,
出手一定會低,可能 75 萬成交左,之後遇埋銀行的 90 萬,
仲差 15 萬,銀行就會用 1500 買紅油淋你。

就算唔好咁折墮、佢跌少少,你都要應付佢每期的供樓支出。
如果主角真係有1000萬本金,佢至少會入數千萬的貨,
每月至少供款幾十萬,個市唔上唔落,
佢一旦邊幾個月無幾十萬俾銀行,結果都係斬倉。

就算升市,只要香港政府突然話要收緊香港信貸,
佢係可以要求銀行將按揭成數由九成改為七成 (香港曾經試過),
到時就算升少少,你都一樣要補倉,補唔到又係要斬倉。

我講咁大堆野唔係妒忌這位天才,只係想講有人做到未必我地做到。
而萬一做唔到可能會賠上好沉重的代價。
默默耕耘可能 on 居 d,但至少穩陣d。
大家都係加油讀好 DSE。

http://hk.news.yahoo.com/80後炒樓王-默默耕耘難搵錢-121218533.html

Herman Yeung


連結 Link:   Herman Yeung 的其他 Blog

連結 Link:   Herman Yeung Blog 主目錄


超低概率 大戰 蟻多螻死象


2012-12-24

啱啱出緊快車下一期的筆記,
諗起關於概率的得意題材,所以執筆寫呢篇野。 
呢個世界充滿住不同的概率問題,
比如股市升跌都係好多香港人關心的問題。
如果有一天你收到一個電郵,
內容係話俾你聽明天股市係升的話,
你可能當佢係玩野電郵,不以為然,
但明天股市真係升,
之後明晚又收到同一個人 send 給你的電郵話明天跌,
而第二日又係跌,你會開始留意呢個人的電郵,
如是者連環十天那個電郵都能預測準確時,
你可能開始覺得佢係一個神人,
之後佢會話要求你俾錢買他的貼士,
如果事主係你,你會唔會願意買這個貼士? 

股票市場唔係升就係跌,估中一天的升跌概率為 1/2 ,
一次半次撞中的確唔難,
但連環 10 天貼中的,卻是一件非常難的事,
概率為 (1/2)^10 = 1/1024 ,簡直係神乎其技,
所以如果你係事主,
你可能對佢的預測深信不疑而願意用金錢買他的貼士,
如果你真係咁諗你就上當了。 

為何上當?
因為再少的概率配合蟻多螻死象就會起一個好微炒的作用,
何為蟻多螻死象?
一件事如果好難成功,
但只要你願意做好多好多次,終於都會成功。
好似今次的例子,發電郵的人可能對股市係一竅不通,
佢只係於網上,經唔知咩的途徑買入 102 萬 4000 個電郵戶口,
之後開始他的計劃,佢將 1024000 的電郵中,
一半的內容係預測升、另一半的內容係預測跌,
第二天將預測正確的 512000 的電郵再發出預測的電郵,
亦係一半的內容係預測升、一半的內容係預測跌,
第三天再將連中兩次的 256000 的電郵利用相同方法一半一半式再做第三次的預測,
如是者,十天之後,1024000 的戶口中,
就會一定有 1000 個戶口係連中十次,
屆時向 1000 個戶口售出第 11 次的貼士,
有人上當的話就會有錢賺。 

我講這個故事當然不是教大家去騙人,
只是教大家不要輕易上人當,
概率再低的情況只要好大規模重覆地做,
最終都會有成功的個案。
而這個蟻多螻死象其實亦應用於正當的行業中,
例如銷售方面。 
大家平日有沒有收到電話問你借唔借錢?
同學都係未成年,當然唔會有這個需要,
他們打的電話是白費,當然成年人的世界中,
想要這個服務的人其實亦不多,
所以這些所謂 cold call 的電話其實命中率好低,
但由於一個成功的個案所帶來的利潤可觀,
財務公司都願意進行這些漁翁撒網的手法去經營。
試想想一個成功的客人可能為公司帶來數千甚至更多的利息收入,
而 cold call 的銷售員一小時的收入可能只係數十,
而每小時可以打數十個,
即係打數千個電話中到一個佢地已經覺得值得。
呢個亦都係解釋到點解我地每個月會收到至少十個借唔借錢的 cold call 電話。 

其實這個蟻多螻死象亦可以適用於大家,
好多同學面對公開試,都會覺得讀的範圍太大,
每部分出的概率都唔高,讀左而唔出又覺得可惜。 
這個時間,蟻多螻死象又可以發揮其作用,
溫公開試有如 cold call,每條出的概率都唔算高,
但只要溫多 d,中的機率就會多 d,5 星星就會易攞 d。 
所以大家面對讀左唔出的情況不要覺得可惜,
每一條讀左唔出的題目其實都係孕育緊一條讀左會出的題目,
呢個期望值的概念我地中國古人就叫失敗乃成功之母,
佢的意思係如果出的概率為 0.01,
你讀 100 題就應該會有1條中的意思。 

眼見聖誕假期開始 
(只是學生的假期,我地這個行業就係 工作 的高峰期,我地行業的最高工時為每星期168小時),
中六的您要好好把握呢個假期,
爭取一分一秒 upgrade 自己,
而我地都會盡力做好每一個課程令大家得到更多,
大家一起加油吧﹗

Herman Yeung


連結 Link:   Herman Yeung 的其他 Blog

連結 Link:   Herman Yeung Blog 主目錄


雅虎財經股神計劃


2012-12-05

今日上 yahoo,無意間見到 "雅虎財經股神計劃",
呢個其實只係一個普通的有獎遊戲,
卻勾起我以前大學時期的回億。 

好多年前,我地讀大學的時期,除左同人補習賺外快外,
仲有一個執多少水腳的方法,就係參加呢類型的有獎遊戲。
我同水魚珊以前曾經參加過兩屆 PIA 
(什麼公共政策唔知咩協會) 攪的遊戲,
遊戲好簡單,1至4人一組,
每組先寫一篇唔記得幾多字的 Proposal 俾政府,
建議政府一d的發展方向之類的野,
入圍後,佢會批 $1000 ~ $2000 俾每組人做第二關的經費,
(第一年有$2000、第二年縮皮得翻$1000),
而每組人就可以利用呢筆錢做一個presentation 出黎,
要上台 present,用唔曬的都唔洗俾翻政府可以自己袋,
而當時慳家的我地,
當然presentation 的成本就係幾張note card 同埋兩支水,
我記得人地果組真係做曬成個模型出黎。 
而我地兩人靠住兩條三寸不爛之舌都好似跑到個第4出黎,
算係咁啦,
而最重要係我地扣除成本仲有一千九百幾蚊落袋 (第一年)。^0^ 

之後都有參加過其他類似的遊戲,
中一個係和黃辦的 3G手機功能設計比賽,
入圍 20 人可參加  Presentation,
當中 10 名可以有 $10000 的獎金同埋可以過美國接受培訓,
我記得我地果陣好俾心機去設計左好多 3G 手機的新功能 
(其實好多而家已經實行左),
我地最終真係入左圍,
20人 Present 中有 10 人可以有 $10000 及出國的機會,
對於當時大學三年級的我黎講真係好興奮,最後?
臨 present 前一日先收到通知,整個 present 要用英文,
因為評判中有外藉人士,對於英文好流的我黎講就知死得啦,
所以最後技不如人落選了。 

中間其實都參加過好多關於股票的遊戲,始終我係讀商科,
唔多唔少都會比其他系的同學有多少優勢,中間參加咁多次,
都曾經贏過幾千蚊傢俬禮券、百佳現金券之餘。 
其實參加咁多比賽除左想執多少外快外,
其實最主要係想有人賞識自己,
讀大學時其實都見到身邊的同學都係高手中的高手,
始終中大會計系當時收生都比較高,
想嚮高手中的高手裡面殺出重圍唔係易事,
通過咁多次的比賽,
希望會有大公司真真正正欣賞我地的才華而俾發展機會我地,
但慢慢一次又一次的失望,
慢慢發現佢地攪呢d活動其實都唔係想搵人才,
佢地只係想利用活動推廣自己公司的品牌或產品,
天真的我地仲以為機會來臨。 

香港地都係要實實際際,
咁多次的挫敗經驗令我地明白都係實事求是做好自己本分,
唔會再諗什麼一步登天或者走到捷徑的可能。
亦可能我們的仕途上的不幸運,
令我地做好自己每一件事,唔敢存有什麼僥倖的心。
工作十年,現略見少少的成績,
身邊有唔少的人覺得我們的成就係幸運之神眷顧而黎,
我只可以講 子非魚 焉知魚之苦,
同學們你地都唔好有僥倖的心,
公開試無疑運氣都係一個因素,
但我見咁耐都只係見到勤力的人因不幸運而考唔到,
而未見過無料的人因幸運而過骨,
大家真係要實實際際讀好每一個課題,
做好每一條數,要不然,成功係唔會降臨於你身。

Herman Yeung


連結 Link:   Herman Yeung 的其他 Blog

連結 Link:   Herman Yeung Blog 主目錄


食朱古力愈多的國家,產生諾貝爾獎得主的機會愈大


2012-11-20

文中前部分︰ 
"食朱古力愈多的國家,產生諾貝爾獎得主的機會愈大,
兩者在統計學上關聯極強,純屬巧合的機率僅萬分之一" 

但文中後部分︰ 
"據BBC稱,當中亦有極少吃朱古力的例子。
作為調查中一個異例,瑞典的人均朱古力消耗量僅及瑞士約一半,
卻仍有很高比率的諾獎得主" 

這兩點有沒有前後矛盾? 
當然沒有,一個係話有極強的相關性,
但 exceptional cases  仍然會發生,就正如一粒正常的骰仔,
擲到 "6" 的機率係 1/6, 即係擲 60000 次,
平均會有 10000 次出現 "6" 有無機會出現其他可能,當然有機會,
例如出現9999 次、10001 次的情況,大家都唔會覺得奇怪。

正態分佈的出現 
實際出現的次數,其實係一個分佈圖,
mean平均會係 10000,而佢有機會偏差於 10000,
偏差得愈遠,機會會愈低,形成一個分佈,
即係出現一些好離譜的情況 (e.g. 100 次) 其實都會出現,
只係機率低好多。
這個是正態分佈的第一個 level,數學 core 的同學都要明白。
但這個世界唔會咁簡單。 

如果個 cases 倒轉,我地唔知粒骰是否有古惑,
利用擲 60000之的方法測試出現多少次 "6",
後期發現只出現 5000 次 "6",
咁我地可唔可以定呢粒骰係出千骰仔?
呢種的問題會於 數學的 M1 出現,
表面上,偏離 10000 愈遠,出現機率就愈低,
但仍然有出現的機率,所以佢係唔係出千骰,答案都只係有機會,
M1的同學就要學習如何計出係出千的機率。 

這個技術亦適用於競選前的預測,
奧巴馬大戰羅姆妮 一戰中,
未有結果之前,各傳媒都會有選前預測,
但測出的結果是否正確,
例如調查結果係 45% 支持奧、55% 支持羅,
這個是否可信?
當然唔可信。唔係因為驚選民轉軚,
而係驚你所選的樣本 sample 中與 population 總體的結果有所偏差,
所以懂 statistics 的分析員就可以從數字中,
計算出其實奧不是必敗,佢會有一定程度的百分比勝出,
這個結果有什麼用途?
用於一些賭博有關的事上,賠率可以為買羅勝出者 1 賠 1.01,
盡信調查結果的人會願意買這個低的賠率,
但對於開賭者的期望收益仍然為正數。 

當然,統計學亦不止用於賭博上。
佢亦應用於風險管理上,
例如一個人出意外的概率為係統計學上一個討論範疇,
因為保險就係用人命作賭注的賭博遊戲,
保險公司其實係全世界最大的合法賭博公司,
其收益可比美馬會。
只要計好賠率,他的生意係穩賺,
所以佢願意用天價請精算師幫佢地做分析,
亦令全港學生誤以為精算師的前途無限。 

精算師是否前途無限,這個又係期望值的 issue,
如果全世界有名的保險公司只有 100 間,
而每間只需要幾個精算師,
而讀精算的學生每年全球數以萬計,有幸雀屏中選的話,
收入為天價,但名落孫山的就要做沒有相關的工作了,
博唔博得過,你自己決定啦。

http://hk.news.yahoo.com/人均朱古力進食量-與諾獎成正比-211718809.html

Herman Yeung


連結 Link:   Herman Yeung 的其他 Blog

連結 Link:   Herman Yeung Blog 主目錄


棒下出孝兒


2012-11-14

但中國人有一句︰ 棒下出孝兒, 
中國傳統智慧 vs. 西方醫學 壓力令人成長,
但壓力同時亦可以迫出病, 
兩者之間可以如何取捨? 
眼見而家d細路係菲傭帶大, 
e哇鬼叫,走黎走去,
菲傭無心教亦無權教 
因為三歲的小朋友都知道自己係消費者, 
都抱住我係主人你係狗的心態對待菲傭, 
而他們的父母呢?
聽果d所謂糼兒學家、心理學家老點, 
採取積極不干預又或者放任政策, 
美其名就話唔好阻礙小童的發展,
實際就係放完工已經咩都唔想管, 
雙管齊下,真叫人嘆為觀止。 
所以我預期香港的街童問題將會愈來愈嚴重, 
香港社工的需求一定會無止境攀升, 
讀社工的同學,十幾年後的前途一定無限限量。 

早十年前,香港填鴨式教育,無咁多所謂多元學習, 
又係唔知邊個嚮度扮專家,推行多元發展 而家呢?
學生抱怨要做好多多餘的活動,
學校又抱怨工作量大增,
大學方面又抱怨入學的學生學術水平唔夠,吃力不討好。
唯一的好處就係大學收多左好多好多學費。

http://hk.news.yahoo.com/兒時遭責打-長大易患癌-211716818.html

Herman Yeung


連結 Link:   Herman Yeung 的其他 Blog

連結 Link:   Herman Yeung Blog 主目錄