訂購 Herman Yeung 數學天書詳情

2021年1月16日 星期六

理念

自2015年睇完 “夢想不盜” 這本書後,不斷思索何為真正的教育...
是否每個星期用大量搭車來回及輪候入班房的時間,
之後再以疲乏的身軀勉強上完一個小時十五分鐘的課堂?
究竟有無更好的選擇?
所以我想推一個全新的補習概念 - - YouTube 學習
無限次安在家中上課,節省無謂的交通時間,隨時隨地想學就學。
按個人的進度決定一天學幾多,每條片睇幾多次,
令大家有足夠的實力應付公開試,
餘下時間可以更有效用發展自己的特長,
不會活在一個只有考試的人生當中,可以有時間令自己活得更精彩。
未來我的 YouTube 平台的目標
是建立一個低收費、甚至部分免費又高質素的自助學習平台,
希望有更多人可以得到更有效率的學習模式,
節省應付公開試的時間後好好發展自己其他的技能。
更希望幫到一些支付不起昂貴的傳統補習的朋友,
多一個新模式讓他們有更多向上流的機會。

最後希望我的行為可感染更多人為教育出更多的力,
改善現行教育不足之處,間接令社會可以變得更公平更公義。
----------------------------
好書‧靴推介 - 夢想,不盜 (Seth Godin) : https://youtu.be/HeM_MGILXQk
----------------------------

2021年1月13日 星期三

笑話一則

今日睇左個故事︰
有一日,動物園的袋鼠跳左出籠外
動物園經開會後,覺得係因為欄唔夠高
所以決定將欄的高度由10尺改高到20尺
改高後第二日,又有幾隻袋鼠跳出籠外
管理員決定再將20尺的欄改到30尺
點知第三日,所有的袋鼠都跳曬出籠
管理員把鬼火將欄的高度一次過改到80尺
改完後,袋鼠就問長頸鹿︰您估管理員會唔會再加高個圍欄
長頸鹿話︰好難講,如果佢仲係唔記關門的話

2021年1月8日 星期五

天命、宿命、使命

我早排睇緊一本關於春秋戰國百家的書
裡面講到孔子相信天命
而他相信的天命,不是宿命的意思
宿命是指結果早已篤定,人不能勝天
而他相信的天命是使命的意思
相信每個人都有自己的使命
而您去做 有機會成功、有機會失敗
但重點不在結果,而在使命的本身
對的事就應該去做,要做到有為而無求
不求如願,但求心安

相反墨子重結果、講實用
不能成功的事絕不會做
因為講求成本效益 (以最低成本獲得最大效益)
孔子重因、而墨子重果
兩套學說,表面看黎係各有理據
但現實中,墨子個套好難去行
因為一件事能否成功,歸根究底都係要看各方面的因素影響
如果只重果而決定有所為有所不為
實際只係減低人生的可能性
凡事講求功利、走捷徑
只會有更聰明的人利用大家功利的心搵笨

我的理解係孔子對一件他認為正確的目標去進發
而墨子就係會對一件有大機會有斬獲的目標去進發
對中國哲學的理解就會理解更多學生的心理,理解佢地係咩學派的後人
以後再有人問︰
邊科學科又有前途又易碌入 (墨家的後人)
我剩係做DSE past paper 夠唔夠5星星 (墨家的後人)
剩係睇您 M2 Tips Class 夠唔夠 (墨家的後人)

我希望我地的學生多D係儒家的後人
正確的方向就努力去做
好多時表面愈戇居的做法,成果可能會愈高
好多人都話巴菲特之所以成功
係因為佢買左一隻股票,佢會持有幾十年
其實醒目仔通常會於幾十年間
把握每次的升跌,高賣低買,諗住賺得更多
結果就係不斷中伏、不斷俾手續費、損耗自己的實力
所以最戇居的做法可能係最有效
唔搵捷徑可能就係最快的捷徑

所以
數學︰睇7書,得天下 💪
大家加油 ^0^



Herman Yeung

連結 Link:   Herman Yeung 的其他 Blog

連結 Link:   Herman Yeung Blog 主目錄 

2020年11月4日 星期三

Herman Yeung YouTube 平台 5 歲啦

5年~我地個平台眨眼就5年 
5年前的一個概念 
得到無數學生以各種形式的支持 
一撑就撑左5年 
5年間我同牛牛拍左 
兩萬條 video 攻左 
maths core, m1, m2, physics, chemistry, biology, 
economics, BAFS, pure maths, additional maths, 
maths and statistics, 中文口試...  
感謝我地一路推進的時間 
大家對我地的平台不離不棄🙇‍♂️🙇‍♂️ 
5年間亦累積了 48,000 個 subscribers 
4,000 萬 views 觀看次數 
一切一切都得來不易 
希望大家繼續支持我地💪💪 
展望第二個五年 
我地有更多的新計劃 
希望惠及更多的學生  
貫徹做到知識開放 
大家可以愈來愈容易得到愈來愈多的知識 
於變幻不定的時勢中 
不斷進步 一起加油💪💪


Herman Yeung

連結 Link:   Herman Yeung 的其他 Blog

連結 Link:   Herman Yeung Blog 主目錄 

2020年10月29日 星期四

提升學習效率的方法

最近我睇左好幾本有關學習效率的書
歸納左幾點 (其實呢幾點都係老生常談)
做到呢幾點,您的學習或工作進度會更快速
1. 一天開始時用15分鐘去計劃自己當日的時間
當然,如果要翻學的時段,您的自主性都唔大得去邊
我所指係您放學之後,可以自主的時間
好多作者都講一個叫番茄時鐘法
大要係一個25分鐘工作加5分鐘 hea 的循環
我舉例,我每天放學食埋飯翻到屋企係 2:00
8點至9點又要食飯,11點訓
2:00 - 2:25 : 呢個時段做翻數學功課第1至5題
2:25 - 2:30 : hea ing ......
2:30 - 2:55 : 做埋果份數學功課的第 6 至10題
2:55 - 3:00 : hea ing ....
3:00 - 3:25 : 做英文功課
3:25 - 3:30 : hea ing ....
3:30 - 3:55 : 睇25分鐘YouTube Chem Chapter 1 的 第15 至20條 片
3:55 - 4:00 : hea ing....
4:00 - 4:25 : 睇多25分鐘 YouTube Maths 天書 A 的第72 至81 條片
...
plan 好每一個時段,您會清楚知道今天的工作是什麼
亦因為寫左出黎,腦會 run 一次您的進度
您的工作壓力反而會減低
因為寫完之後,您可以係自我高估工作的份量
好多時,您真的要完成的內容比想像中少
另外,您寫低左您做過 d 咩
就係一個有規劃的工作藍圖,比起即興的工作模式會帶有更好的效果
2. 善用中間的寧碎時間
人生好多時間都係唔知有咩好做
比如︰等車、等人、等位、或者搭車、又或者阿媽未煮好飯
好多時,呢堆時間都係 hea 走左
但係如果您 plan 好,一有呢 d 零碎時間就做某一件事
化零為整就會好好用
例如︰您可以凡係出現呢D時間就開 econ 的 playlist 出黎聽
因為 econ 可以唔睇畫面都 get 到7、8成
每次利用零碎時間去聽,可能好幾個月已經聽過一次整個 playlist
聽的時間唔洗太專心,因為呢堆時間係賺翻黎
有一個印象俾潛意識已經好好
而我就會用呢 d 零碎的時間去預備一 d 我未開始拍或未開始做的 topic
如果嚮街,可能係上網搵下料、或者去 google 圖書睇下料
如果嚮有電腦的地方,可能打下相關資料
好多時,無咩意識的工作會加快日後工作的效率。
3. 不要長期集中,要有放空的時間
我睇過好幾本書都係講呢個概念
一個人長期集中,學習的效果未必係最好
一段時間的集中,再加一段時間的放空
腦就會有機會整理您唔明或者 kick 住的地方
好似我做 physics 時有時諗唔通
我會改做其他科或者其他工作先
之後再翻轉頭睇又會諗得明
有時欲速不達,所以您 set 第一點所講的時間表時
都可以留意,如果您有一d預左好難的工作
不要一味得果類的工作
有時個腦塞左就無法前進
所以 set 還 set,可能有兩手準備
如果順利,就長驅前進,萬一 kick 左一段時間,就先攻其他部分先
所以大家睇我地的 YouTube 片時都要有呢個戰略
有時唔明,唔洗死轉,
嘗試先繼續前進,可以我講天書A的 Complex number 有部分 kick 住
下一個 section 的 function 會比較易
一路睇落去,同時 mark 低您唔明的片係第幾條
一段時間後翻睇,可能就會明翻
當然,有買天書的同學就要善用您的問書服務
令自己 kick 住的部分更快解決
以上三點係我最近睇的幾本書之精華
佢地只係用不同次序、不同切入點、不同的自我經驗幻化出不同的書
只要大家反覆使用,就會效率突飛猛進。



Herman Yeung

連結 Link:   Herman Yeung 的其他 Blog

連結 Link:   Herman Yeung Blog 主目錄 

2020年10月24日 星期六

同月同日生


數學概率題 Core Probability Question 

開學無幾耐,全班 41 個同學,
問當中有兩個或以上係同一天生日的概率為多少? 
(簡單少少︰假設無人 2月29日 生日) 






答案︰ 
表面上,要將 41 位同學分配於 365 日中而不重覆好像不難,
但實際要佢地 41 位互相避得開的機率 只有 9.7% ⋯⋯
即係 41 位同學當中,有兩個或以上係同一天生日的概率為 90.3%。 
這個是一個非常高的數字。 
(詳情可看以下圖片) 
(數字答案為 (365! / 324!) / 365^41 係一個連計算機都禁唔到的答案。) 

好多事感覺和實際都會有一定程度的距離, 
這個概率上的特別現象其實 稅務局 早早已應用於防止瞞稅上面。 
如何應用? 
有好多人做假數係靠自己的感覺加好多出入脹出來, 
人類的心理學上會覺得 1~9 的數字出現應該係平均, 
所以做假數時會潛意式中好平均地出現 1 ~ 9 的數字, 
但實際不是如此, 
1 ~ 9 的出現頻率於非假數的系統中係有著一個好特別的分佈, 
只要將佢地盤數輸入電腦, 
電腦就會好容易偵測到那一盤數為人手加工, 
對於防止做假數起左好大的作用。

Herman Yeung































連結 Link:   Herman Yeung 的其他 Blog

2020年10月15日 星期四

需求定律 (law of demand)、生產者物品 (producer goods)、消費者物品 (consumer goods) 和 水魚者物品 (water fish goods)

經濟學上有一個定律叫需求定律 (law of demand), 
佢意思係一件貨品,隨著價錢愈高,需求量就會愈低 
例如一餐飯,如果訂價係 $50,
平日可能會有20人購買 
但如果訂價改為 $100,買的人就會少左 
相反訂價改為 $20,買的人就會多左 
理論係,每個人的購買力不同 
如果A手上只有 $40的人,
於第一、二個情況A根本無可能幫襯到 
另一個原因係,每個人心中呢餐飯的價值都不同 
例如佢賣果種食品,係唔啱您口味 
嚮您心目中,佢可能只值 $20 
但於某些人心目中,啱佢口味,
佢可能 $100 都會買。 

呢個係需求定律,
但世界上有好多野都係符合唔到需求定律 
例如,一隻股票的價格 
大家試想想,如果隻股票昨天股價是 $50 
今天突然升到 $100,普遍的股民會做咩?會追入 
相反今天突然跌到 $20,普遍的股民會拋售 
點解會咁呢? 
當然與上面一餐飯的情況不相同 
今次講的係股票,股票大家係買佢的前景 
如果價高,本來成本高左, 
但人類會認為價高的理由係
因為其他人類知道一D自己唔知的消息 
令其他人類感到呢隻股票未來的前景因素有利好狀況 
作為非內幕人士,急不及待就跟住買入 
相反如果股價突然大跌,即使沒有相關公司的新聞 
佢都會覺得一定有內幕人士知道呢間公司會有大鑊野將要公佈 
所以君子不立危場之下,沽定先 
咁需求定律算唔算唔成立呢? 
當然唔算,因為需求定律好醒咁加左句 
在其他因素不變的情況下” ,價格上升會令需求量下降,反之亦然。 
今天股價忽然波動,擺明其他因素改變了 
所以唔算違反需求定律  

OK,咁我地講第二個例子 
有些產品,價愈貴,愈多人想買 
例如名牌,名牌明顯比其他牌子貴好多 
但點解需求量有時仲會比其他牌子高呢 
除左講佢的質素比較高外 
其實名牌有一個比其他牌子額外附送的作用 
就係將人的身價提升 
又或者講,有些人係需要外物來顯示自己身價, 
其實都係自卑的一種表現。  

好多年前,有一個補習天王 
每日都帶一隻幾十萬的勞力士錶上堂 
佢於 visualizer 寫字時,就會不其然出然於大大的 screen 中 
呢隻表嚮經濟學上,不是消費者物品 (consumer goods) 
而是生產者物品 (producer goods) 
[消費者物品 (consumer goods) 係指您買呢件野係自己消費之用 
而生產者物品 (producer goods) 係指您買呢件野係為左進一步生產] 
點解呢?係因為佢買左呢隻幾十萬的名錶 
同學仔自然會爭相討論 
覺得佢家裡有礦,而再推演就係 
為何佢家裡有礦呢? 
就一定係因為佢收入好高 
又為何收入好高呢? 
一定佢有好多學生 
又為何佢有好多學生呢? 
一定係因為佢教得好好 
所以同學更加願意進貢金錢補佢的堂 
所以呢隻勞力士係為佢帶黎收入,
故稱為生產者物品 (producer goods) 

有時生產者物品 (producer goods) 和消費者物品 (consumer goods) 好難區別 
例如一個去補習的學生 
補習呢個服務是生產者物品 (producer goods)、
還是消費者物品 (consumer goods)? 
一般大家都認為係消費者物品 (consumer goods) 
因為補習係為提升自己之用 
沒有直接進一步生產的意圖 
但實際上,有些同學係買緊 生產者物品 (producer goods)
我的意思係,有同學因為想自己未來做補習天王 
所以就去補習,以圖理解補習中會教咩、講咩,日後可以好好利用 
某一間機構 (唔開名) 就理解有人有這個心理,大撈一筆 

佢會有以下的步驟 
1. 做到補習天王收入好高,令同學趨之若騖 
2. 補習天王出埋聲話日後會請大量手下,令同學覺得入行機會高
3. (呢一步係佢地做得最自然) 教得好廢,令同學覺得佢咁廢都搵咁多 
(吹個數的確係好多),令同學覺得自己教得比佢教得好就想唔發都唔得。

如是者,補習的學生真正的身份係淘金者 
而最後?賺完您錢,第二年就扮唔記得左您,明年又呃過另一班人 
所以佢地所買的不是 消費者物品 (consumer goods) 
其實都不是 生產者物品 (producer goods),
因為佢都無辦法再利用黎再生產 
佢地真正買的係 水魚者物品 (water fish goods) 
至於 water fish goods 定義係咩,大家自行演繹



Herman Yeung

連結 Link:   Herman Yeung 的其他 Blog

連結 Link:   Herman Yeung Blog 主目錄

2020年10月11日 星期日

過度理由效應

上半年做緊 DSE Econ 的拍攝工作時 
我記起一D DSE 唔考的經濟理論都幾得意 
同大家分享一下  

從前有一個老人家,有一班細路成日嚮佢屋企門口玩 
好嘈,嘈到佢無日安寧,佢決定諗諗計去解決 
第二日,佢出去同班細路講 
“細路阿細路,我老人家好鍾意熱鬧 
聽到您地大聲叫就成個人開心曬 
不如咁啦,您地日日嚮度叫,
我會俾錢獎勵您地 邊個叫得最大聲的,
我會俾最多錢獎勵佢” 
(您無聽錯,我無打錯,佢係叫班細路嘈得大聲D)  

過左好幾天,細路係咁嘈,老人家都真係俾錢佢地 
但過多幾天,老人家開始愈俾愈少錢 
最後甚至唔俾錢獎勵佢地添  
之後細路就抱怨點解無錢架 
您估我地嚮度叫唔攰架 
無錢以後都唔會嘈 

就係咁,以後班細路就無再咁嘈  
呢個理論就係叫 “過度理由效應” 
佢地班細路唔記得左第一秒佢地選擇嘈係因為想玩 
唔叫就係放棄左娛樂,
而佢地唔想放棄娛樂,所以博命叫 

但及後老人家的出現 
令佢地認為唔叫係放棄金錢的利益 
(因為金錢的利益比娛樂價值更大) 
令佢地忘卻娛樂的好處 
所以一旦沒有金錢,他們就覺得叫已經無意義 
因為有呢個 “過度理由效應”,所以點解大家要 “無忘初心”


Herman Yeung

連結 Link:   Herman Yeung 的其他 Blog

連結 Link:   Herman Yeung Blog 主目錄