好書‧靴推介 - 漫畫貫通世界史 金相勳 著

呢幾日睇左呢本一年前買的書
幾好睇，佢由 Lucy 講到西元1年
當中世界不同地區的歷史
歐洲、非洲、中國、印度、古巴比倫、羅馬、韓國、日本好多個地方的歷史都有講到
對於我唔係太熟世界歷史的人黎講
我知多好多歷史故仔，但D人物名真係記唔到
尤其歐洲果邊D名，我明明記得某某死左，
但後幾版，佢又出現翻，我心諗係穿越定復活？
原來係個名太似，其實係兩個人 ^0^
當中有好多知識真係唔睇唔知
絲綢之路比我想像中長好多好多
其實當時運輸或者商貿應該都好繁榮
亦估唔到日本呢個咁先進的國家
原來佢係比中國、韓國遲好多脫離石器時代
呢本書我買的時間只係得第一冊
佢話佢會出到第五冊，但我可能接觸某塔太多
講就天下無敵、做就無能為力
心諗多數老點
但今日一 search，佢真係出齊左5本
我覺得呢本書D公仔好得意，但如果真係想學好歷史
睇黎真係要花D時間背翻好D人物名先
呢本書係值得推介，作者係 金相勳
相信係韓國人，所以本書都講唔少韓國史
大家有興趣睇下 ^^

Herman Yeung

連結 Link:   好書 ‧ 靴推介

連結 Link:   Herman Yeung Blog 主目錄

睇左一本關於未來產業預言的一本書

尋日睇左本書
書名唔記得，因為睇到人地收鋪被人禮貌地叫我地離開
所以無買、亦唔記得書名
但內容都幾新鮮
係講一個研究經濟的團隊
花了十年的時間，研究世界未來的走向
佢提到人類史上的兩次工業革命
亦預言未來快要出現的第三次產業革命
內容大概係講國富論中提出四大生產要素
Factor of production (有修 DSE 經濟的同學都會識的一 part)
係指︰企業家 enterpreneur, 勞工 labour, 資本 capital, 土地 land
而具體的定義為︰
勞工 labour - 人力資源 human resource
資本 capital - 人造資源 man-made resource
土地 land - 天然資源 natural resource，當中不只我們平日所講的土地，亦包括石油、煤、而呢本書更將定義變得更廣泛到食物、清潔的食水、...
呢本書指出之前兩次工業革命
最重要係將 勞工 labour、資本 capital 的 效率 efficiency 提高
當中包括引入機器、同埋 division of labour 分工合作
但係而家世界面臨的問題係天然資源不足的問題
而當世界不斷宣揚世界的天然資源 (石油、媒) 會於不久的將來用完，同時亦宣揚地球的污染加劇，令人類的生活質素不斷下降時
作者提出了一個新的觀點
就係未來幾十年，將會係人類第三次的產業革命
而內容係如何將天然資源用得更有效率
書中有好多的數據係指出，而家發電廠的發電過程中
原來係有好多的 energy loss
如果有更高的科技改善相關的 energy loss
就會令天然資源缺乏的問題大大改善
當中作者指出，以而家已經發明左的科技
用於世界的發電廠的話，已經可以因減少 energy loss
而多發 25% 的電力
另外，金屬使用方面，以美國的技術
建築物中使用的銅，於拆卸時，有百分之60可以循環使用
而中國的就只有百分之5
而美國今天亦不斷研究，起一幢樓時係將一堆預製的組件堆研出黎，他日要拆樓時，可以好似 lego 咁拆開好多 part 出黎循環再用。
即係話，當大家都話銅資源好少而炒高銅價時
只要於 recycle 上著手就可以大大增加產量
而呢本書亦提到好多人力資源其實係浪費了
例如司機，而家世界有車人士係一個天文數字
佢地每天都要花時間揀車
但係不久的將來會出現無人車
而無人車可以節省大量的人力資源及減少交通意外的數字
呢本書帶出兩點
一. 而家好多人話資源唔夠，但係大家花時間去尋找新資源之前，其實發展技術去善用現有資源會係更實際及更大的商機
二. 呢本書預言，二十年後，世界有6成人的職位係而家沒有的，當中我唔係睇得太多就走左，但係佢大概的意思係例如當無人車普及後，司機的工作會消失而被迫轉型，而新科技又會帶黎新職位，未來幾十年可能會有好大的世界改變
幾得意的一本書，而當中的預言無論準唔準，大家要有一顆隨時要面臨挑戰的心，去應付未來世界的轉變，一切不合理、沒有效率的商業模式，將會成為博物館的展品

Herman Yeung


連結 Link:   Herman Yeung 的其他 Blog

連結 Link:   Herman Yeung Blog 主目錄

好戲‧靴推介

(1)   星河救兵 / 石破天驚

(2)   大國崛起 主持︰狄娜

連結 Link:   數學天書 訂購表格及方法

連結 Link:   Herman Yeung Blog 主目錄

好戲靴推介 - 星河救兵 / 石破天驚

上次10月1日直播果陣 阿珊介紹過兩套西片
一套係 Galaxy Quest
我以為 Galaxy 係牌子名添
原來 星河救兵 係 Galaxy Quest
上次阿珊講話有班演員係演星球大戰之類的電影
但外星人以為佢地係勁人
搵佢地帶拖打其他外星人
而果班演員又以為只係一個登台 job
亂打亂撞與第三個星球的人打扙
又好彩有一班電影發燒友的小朋友
幫佢地發揮太空船的功能打抵班奸的外星人
好攪笑的一套電影
而另一套係 "The Rock"
中文名係石破天驚
香港人改電影名係勁好多
如果呢套嚮中國播，佢地應該係照譯做 "石"
而大家都會以為係 Discovery channel 的紀錄片
全片影住舊石頭，
利用超快鏡睇住佢如何過無數個日與夜及春夏秋冬
(令我有咁深的感受
係因為有套電影叫 007 - Die another day
香港就叫 "不日殺機" 幾咁型
而中國就叫 "擇日再死"
R爆頭)
但香港的石破天驚
一聽個名就想睇
片中的 Sean Connery 係一個好好身手的阿伯
幫 Nicolas Cage 一齊救人質
仲記得果堆綠色的珠珠
一爆左就要打強心針落個心口度
綠色珠珠好似識得分辦善惡
因為我記得壞人整爆左，1秒條友就死
而主角整爆左，佢有15秒以上諗野，再打強心針
真係好有人性的珠珠 ^0^
(大家見到我打 Sean Connery，係未覺得我真係好似一個Native Speaker 呢？ 其實我都係照打個封面 =P)
大家有機會睇下呢兩套戲
尤其有D學校要學生做 西片觀後感
呢兩套都係正野
我地以前有兩年都成日要做呢D 西片觀後感
(佢有個型D的名，但我唔記左叫咩名啦)
一年要您睇幾十套戲
邊有咁多戲睇呀
終於我由史泰龍的第一滴血睇到第九滴血都未做齊佢地個要求

Herman Yeung


連結 Link:   好戲 ‧ 靴推介

連結 Link:   Herman Yeung Blog 主目錄

好書‧靴推介 - 幸福是我們的義務 吳媛媛 著

最近睇緊呢本書，192頁，睇左83頁，仲未睇曬
但已經好想好想介紹呢本書
呢本暫時係我繼 "夢想．不盜" 後
覺得最不能錯過的書 (我未睇完已經咁震撼)
佢係一本講述由一個台灣女姓
嫁去一個瑞典家庭，生活了一大段的時間後
寫出瑞典與台灣不同之處的書
內容好廣泛，其中有幾點係我好震憾的
作者話，瑞典(以至於其他歐洲國家) 都面臨一個問題
就係人力資源缺乏的問題
(沒有天然資源的國家，可以令自己富強就必需要靠人力資源)
所以國家極重視人力資源發展的事項上
由刺激出生率講起，瑞典國家
男女都可以有一個好長的產假
法例亦規定放產假時，員工仍然可以獲取80%的收入
以刺激國民生育
如果生多幾位小朋友後，其中一方要全職照顧小朋友
國家亦會有津貼，令佢地的生活可以維持
瑞典亦會對樓價嚴格管制，
市區和效區的租金會被要求完全相同的水平，
唔會因為俾人炒高左個價，
令國民要為生活費煩惱而犧牲家庭生活
(瑞典好著重家庭生活，希望國家的小朋友可以快樂成長)

教育方面更令我震撼
小學生的功課必需於校內完成
即係放學沒有功課，令佢地有更多的時間於遊戲中學習
但佢最主要咁做的原因係因為
瑞典明白，如果功課家中做會出現一個不公平的情況
家中的父母如果知識水平高的話會有好大的優勢
所以所有功課校內做可以令所有學生
當面對功課問題時，可以即時向同一個老師發問
以減少不公平的現象
另外，佢地考大學入學試時
數學科係有 oral 呢份卷
中、英有 oral 唔出奇，但數學有 oral 係一個咩的形式？
教數學咁多年的我都覺得有點兒抽象
原來佢地數學 oral 係俾一堆資料您
例如俾一個 Quadratic Graph 二次圖像您
您就要講到圖象內表示左 d 咩
同埋圖象與生活有咩關係
瑞典係一個好重視教育的國家
同時亦係好重視如何教育出具批判性的人才
佢地教數係想令學生理解如何分析日常見到的數據
希望大家見到商人、政客給予一大堆資料時
可以利用自己的實力分析到呢堆資料
而唔係只係睇個結論
因為結論可以係誤導的
而瑞典的師範學院，教 教師 如何教都有一套好特別的方法
書中提到一點令我覺得香港的教育非常慚愧
係師範學院的教授於最後一課時
問面前的學生 (即未來的教師)
教授問︰瑞典的首都嚮邊？ 學生(未來教師)答︰斯德哥爾摩。
教授再問︰為何要係斯德哥爾摩？ 學生(未來教師) 啞口無言
點解教授要咁問？
佢唔係真係認為學生(未來教師) 會答到
而係佢想學生(未來教師) 記住呢個感覺
希望呢班教師未來都會令自己學生不斷有呢個感覺
一個通過發問引發學生自己去沉思問題的一種過程
真真正正去訓練一個識用腦的人才

而香港呢？
某 D 補習從業員問︰瑞典的首都嚮邊？ 學生啞口無言
某 D 補習從業員︰我會教您唔識都攞到分

於教育層次黎看，香港真係停留於石器時代
香港政府的教育 slagon 完全係 : 求學只係求分數
瑞典與香港好多野好唔同
最主要係瑞典真心重視人力資源
真心去攪教育
但香港呢？政府認為真正香港的人力資源太多
佢地唔會利用政策鼓勵生育
只會利用批大陸人落黎溝淡香港的人力資源
政府亦唔想香港人太有批判性以至批判到佢地的施政
就要利用考試帶黎的恐懼令大多數人變得有好強的奴性
而家仲要將香港本來的強項數學慢慢通過教育改革、cut syllabus 的形式令其優勢削去
之後仲會有普教中、引入簡體字的一系列措施
一步一步將香港的人力資源質素與大陸接軌而不是與國際接軌

我諗香港教育的問題，我唔講大家都會知
餘下的問題係，香港人如何自處？
呢個問題係我地香港人值得投放資源去研究

呢本書我睇完之後會拍片同大家再分享一下
大家有機會於書局見到呢本書，真係攞黎睇睇
睇下外國的情況就會知香港有好多範疇真係完全唔入流

Herman Yeung

連結 Link:   好書 ‧ 靴推介

連結 Link:   Herman Yeung Blog 主目錄

好書‧靴推介 - 丟掉 40 個「虛假」的好習慣 午堂登紀雄 著

呢本就係上次中秋節直播時
阿珊介紹兩本書的其中一本
"丟掉40個虛假的好習慣"
當中一個要丟掉的是建立人脈關係
作者的論點係自己去建立的人脈最終都係難以維繫
而當作者成功後，人脈關係隨之而來
所以大家應投放時間於實務上而不是人際關係上
吹棒人際關係的人主要係一班上位者
想利用大家想向上游的心理
招收一班免費義工
他們只係給予一個根本不存在的遠景
已經可以令無數人趨之若鶩
浪費時間、金錢上去
而事實上，大家最後都係一無所獲
所以作者認為大家應該要放棄追隨別人的框架
為自己的事業努力
即使唔係自己創業，都無理由花太多時間於人際關係上
在上位會用您的理由從來不會因為您擦鞋
而只會係您真係為佢地帶黎利益又或者您其實係佢地的親戚
努力增加自己的見識及實力
將自己變成一個有才能的人
自然世界通行
企圖拉關係上位的話
就算成功，一朝天子一朝臣
人地改朝換代之時，大家就會變成棄將
大家有機會去到書局見到呢本書可以睇下佢點講人脈關係 ^^

Herman Yeung

連結 Link:   好書 ‧ 靴推介

連結 Link:   Herman Yeung Blog 主目錄

好戲‧靴推介 - 大國崛起 主持︰狄娜

無意間搵翻呢兩集 DVD
係由狄娜主持的大國崛起
好多年前買的，背後寫係2007年的產品
當時買左之後，好短時間就睇曬咁多集
內容係講述 9 個國家︰
葡萄牙、西班牙、荷蘭、英國、
法國、德國、日本、俄羅斯、美國
如何興起、富強及後期有部分衰落的原因
唔少國家興起的背景都係大航海時代
之前大家有睇過我去海上雄師展覽果篇 blog 的人
都會知道我對大航海時代係有一個好深的情意結
一隻好好玩的 game 令我對大航海時代的歷史著迷
雖然我的世界歷史只係讀到中二就行人止步
但對於該時期的歷史非常有興趣
正正呢個特輯就有好幾集係講果個時期
了解更多就知道一個國家如何成功及失敗
就能令人更容易深思一間機構甚或一個人如何成功及失敗
呢兩集碟，主持真係講得好好
故事講得精彩及有好多冷知識
我咁多年前睇都仲記得主持介紹過拿破崙呢位前半生非常成功的人物
於晚年失敗後被放逐至一個叫 "elba" 的地方
嚮去緊的途中作左呢句詩
"able was i ere i saw elba"
呢句詩係左右對稱
意思是︰我看到 "elba" 呢個地方之前，我係非常能幹的"
英雄墜落的故事令人唏噓
亦明白歷史只係記住成功的人而遺忘失敗的人
所以我地更加要努力，未成功之前不要放軟手腳
我地一定成功而唔會見到 "elba"
共勉之﹗

Herman Yeung


連結 Link:   好書 ‧ 靴推介

連結 Link:   Herman Yeung Blog 主目錄

好書‧靴推介 - 化學 - 有關化學的100個知識 100 Knowledge of Chemistry 邢豔 著

尋日直播講過睇左本有關化學的書
"化學 - 有關化學的100個知識
100 Knowledge of Chemistry
邢豔 著"

分享多少少俾大家參考一下
1. 講水可以助燃
當你煲水時，煲滾溢彈左D水出黎
D火係會即刻燒得更旺
因為爐頭好熱的緣故
加入水 (H2O) 就會同煤 (C) 發生化學作用
變成一氧化碳 (CO) 及氧氣 (H2)
兩者都會令爐火燒得更旺

2. 另外巫婆 寶劍 沾左仙水 刺向草人會流出血
係因為 仙水 係 Na2CO3
而草人身上係 黃裱紙
而當 鹼 (Na2CO3) + 黃裱紙
黃色即變成了 紅褐色


Herman Yeung


連結 Link:   好書 ‧ 靴推介

連結 Link:   Herman Yeung Blog 主目錄

好書‧靴推介 - 傻瓜可以改變世界 村上和雄 著

啱啱睇完呢本書
買呢本書的確係因為俾封面個頭吸引住
再揭下個內容覺得幾得意
作者係一個日本生物化學系教授
成功解讀高血壓致病因素的科學家
呢本講好多唔同範疇的內容
好多都好得意
但最震撼我的是作者提到
科學研究有分 day-science 同埋 night-science
大約意思是 day-science 係從過往知識再推論而得到的新發現
而 night-science 係因巧合或者可以話亂打亂撞得出黎的新發現
呢個可能係因為一次錯誤的實驗、又或者唔記得將某些樣本保存好而受潮氧化負碌撞棍地得到新發現
作者話好多大發現都係由 night-science 發展出黎
而呢 D 發現，後人會總括為 "運氣" 兩個字
但作者就話 "運氣" 的出現係要有三個條件︰
1. 正直而專注的眼神
2. 尊重 "無用" 的心，即係唔介意不斷嘗試，即使每次都是失敗
3. 從失敗及錯誤中找出端倪，好好把握
作者用自身的經驗、科學、哲學、DNA的角度
去解釋一個世人眼中的傻瓜
(即係先天能力不佳，但專注做一件事
哪怕果件係一件成功機會率極低的事)
最後都會受到上天的眷顧而得到成功
相反，世人眼中的聰明人
每件事都要計算可行性、值博率的人
往往都會畫地自限，沒有太大的突破
書中提到唔少範疇中有突破的人
初時都是哪些界別中的門外漢
但正正他們是門外漢
才會做出界別精英眼中的愚蠢事
例如去研究一些表面無可能成功的內容
就正正沒有精英去研究
反而提供左一個未被開發的寶藏給傻瓜去發掘
只要傻瓜夠專注，上天會給予傻瓜回報
從一個科學家中聽呢個好似唔係好科學的結論
其實係一個好大的安慰
我地每個人先天的條件唔同亦無法改變
但原來能否有所成就，大部分係基於後天的努力
勤奮、專注去做一件事
不要理會別人的眼光，切切實實去做一個傻瓜
上天一定係令您成功
而傻瓜亦真係可以做到改變呢個世界
我地當中可能或多或少都做緊一D旁人眼中的傻事
但可能我地唔受旁人的目光，不被他們動搖繼續堅持
日後真係可以得到好的結果
希望天下傻瓜 (包括我們) 繼續堅持到最後。


Herman Yeung


連結 Link:   好書 ‧ 靴推介

連結 Link:   Herman Yeung Blog 主目錄

好書‧靴推介 - 和牛津、劍橋、新鮮人一起思考 (60個絕妙問題，激發你的創造力) 約翰．方頓 John Farndon 著

呢本又係上一次直播有講過的書
上一次直播，有同學問左一D抽象的問題
即時令我聯想到呢本書
佢都問左好多好奇怪的問題
例如，你可以如何好準確到稱出自己個頭的重量呢？
除左切出黎係會量得準外
其他的方法都只不過係估計
佢書中都唔係俾到一個咩好方法出黎
但係會用好多個唔同的角度去分析同一條問題
呢D可能係牛津、劍橋面試時所問的問題
如果能夠於有限資料或資源下
用唔同角度去分析同一件事就係一個智者
大學想尋找智者學生就用呢D問題
而我地就可以睇呢D書擴闊自己的諗野模式
而家個世界不停咁變
好多事情好難去判斷誰是誰非的年代
的確需要有新的諗野模式為我們自己去解惑
呢個就係點解我同阿珊咁鍾意睇禪、哲學的原因
呢本需要唔係呢兩個範疇
但都令我地可以知多D
亦都學到一件事可以有更多的方向去睇
雖然睇咁多呢方面的書未必能夠令我地做到智者
但於呢個愚民的世界風氣下
可能保留一點冷靜去看待每事每物


Herman Yeung


連結 Link:   好書 ‧ 靴推介

連結 Link:   Herman Yeung Blog 主目錄

好書‧靴推介 - 動物農莊求生計 一場實現改革創新的 MBA 經典故事 維傑．高文達拉簡 & 克里斯．特林伯

有好多同學話想入BBA
如我直播所講，BBA 其實講求實用
但如何實用呢？
呢本書係一個好好的書
內容係講一間由動物經營的農場
長年經營不善之餘，仲要個老細年老被迫退休
最後仲死埋添，傳左個領導位置俾自己個女
個女就係一隻綿羊 Stella
由於 Stella 新人破格升到領導位置
所面對第一個問題，就係下屬不服的問題
後期又由於煩事太多，仲忘記將原材料對沖
所以本來負債累累的農場上再更加百上加斤
之後又再發生下屬發生大規模內鬨
Stella 自己的男朋友又分手
地主又迫 Stella 賤賣農場
Stella 雖然想推動新產品
但推動過程又引起內部的職員不斷反抗
加上推動後的成果未如人意
好多好多的問題出現
成本書就係講 Stella 如何解決種種問題
完全就是 BBA，甚或 MBA 所讀的技巧
實戰於呢個動物農場上
最後當然係 happy ending
但當中唔係空範地扔個專有名詞出黎就算
亦好細緻描述如何面對及解決呢堆問題
想讀 BBA，甚或我呢D讀完 BBA 的
(我係 Major : Professional Accountancy
但都係 BBA 學系的一個 Stream)
都覺得學左好多野，真心好值得睇。
(P.S. 我嚮書局見過同名但唔係呢本書
所以大家真係買都要小心唔好買錯
留意作者係  維傑．高文達拉簡 & 克里斯．特林伯)

Herman Yeung


連結 Link:   好書 ‧ 靴推介

連結 Link:   Herman Yeung Blog 主目錄

好書‧靴推介 - 慢下來......幸福就不會擦肩而過 何權峰著

呢本係前幾晚直播時，阿珊介紹的一本書
當中有幾句的確好有意思的
1. 「放下」與「放棄」是不一樣的。放下，是一種心態上的昇華；放棄，則是放棄自己與希望。放下，可以讓人輕鬆自在，放棄則是讓自己陷入痛苦沮喪。
2. 人生有得有失，境遇有好有壞，所有狀況都是暫時的，沒有一件事會永遠不變。困境不會是永久的，難關也終將過去。

除左呢D有意思的句子外
書中亦提到好多時人的煩惱只係庸人自擾
一個故事幾得意，講一個禪修的活動，百幾人坐嚮一間房內
坐下坐下，近窗的就話凍、唔近窗的就話熱
有人話凍時就關細個窗，有人話熱時就開大個窗
如是者無一刻可以討好每一個人
直頭最後，一名參加者由於開窗用力太猛
成隻窗隊左落街之後
大家就無再為冷熱提出意見

好多問題只要接受左就唔係問題
不斷的排斥只會令個問題不斷困擾
具體D咁講，有D問題係人類可以解決的
就要積極去解決
有D問題係無法解決的，例如已成事實的
就不要再排斥，要接受後好好生活下去
只要分清楚有咩可以改變
有咩則要接受，人生就唔會再咁攰
就唔會再浪費時間精力於心靈上的交戰身上。

Herman Yeung

連結 Link:   好書 ‧ 靴推介

連結 Link:   Herman Yeung Blog 主目錄

好書‧靴推介 - 劍橋倚天屠龍史 新垣平著

呢本係前年書展買
大家圖中見到黃色牌就知係平野
100蚊7本定係$20本就唔記得
但一定係特價貨
上年書展我見到仲有得賣
不過升價到 $30
原來書真係有升值能力
今年大家去書展可以留意下呢本
希望唔會再升價
呢本書的內容係由新垣平博士
將倚天屠龍記的情節配合真正的歷史
加埋作者自己的幻想力合併一部比倚天屠龍記更完整的故事
倚天的情節加入好多歷史背景
清楚解釋當中情節發生之理由
能倚天的故事更好睇、更合理
好少小說可以令我兩日睇完
大家有興趣留意下書展有無得平賣

Herman Yeung


連結 Link:   好書 ‧ 靴推介

連結 Link:   Herman Yeung Blog 主目錄

好書‧靴推介 - 看漫畫 學化學、DNA、遺傳、物理

看漫畫 學 __ __ 系列
我第一本係睇 看漫畫 學化學
嚮圖書館借的，大家可以 search 下
封面會唔同我圖中果本，但內容相同
由淺入深，都包左唔少 HKDSE 化學內容
寫得幾易明
之後我搵埋佢三個兄弟買埋
化學果本就睇曬，明多左好多我之前唔明的
而 DNA 果本真係好得意
佢講到 DNA 未發現之前
已經有電腦專家描述日後的機械人
會於每一個零件中，save 低全架機械人的設計圖
好讓它日後損毀了部分配件時
可以自我找原料修復
呢個正正係一個問題
如果個個機械人都有自我修復的願望
即係當機械人發現自己有所缺時
會否因為要尋找資源而攻擊人類呢？
可能只係 Pre-set 時一個指令上的出錯
要求機械人不斷複雜自己
佢地就可以無限量需求資源
如果人類滿足唔到佢，就會發動戰爭
最後的問題只係機械人同人類打邊個能夠取勝的問題
但而家已經發現 AI 於軍事上的決策
已經比一個有幾十年經驗的司令勁
即係人類係輸硬
所以研發 AI  有如玩火
人類真係要自求多福。

Herman Yeung


連結 Link:   好書 ‧ 靴推介

連結 Link:   Herman Yeung Blog 主目錄

好書‧靴推介 - 第九隻兔 王興川 著

這兩天無意間翻起這本書
亦不知不覺間看完這本小說
我覺得幾好睇
佢係講述因為溫室效應、食物嚴重短缺
兔界面臨頻臨絕種的危機
兔界中欲解決今次的危機
建議派出遠征隊到達遙遠的山頭
希望可以於新的地方中得到新的生機
但要到那個遙遠的山頭
必需過渡有狼、獅子的地方，
以及可能面對未知的危險，
所以遠征隊於自願參與的情況下，
只有一隻兔參加左
呢隊只有一隻兔的遠征隊開始出發，
但出發無耐，兔界的皇族怕會因為呢隻兔的緣故
而俾狼知道佢地的存在，
引發一場引狼入室的危機
所以派出殺手兔去殺呢個主角
主角當然可以避過此劫，
而且經歷千辛萬苦，真真正正發現到新生機的樂土
主角發現後回到兔界叫他們遠遷於這片樂土
但兔界的皇室因怕改動會帶來未知的危機
不願遠遷之如，仲下令要處死主角
經過一段情節後，主角走甩左，但好多幫主角的都枉死了
兔界的皇室仲下令卦城，唔俾任何兔出城
最後官迫兔反，出現史無前例的暴亂，
所有兔都衝出城向新樂土進發
留下的就是不願改變的兔界皇室
而他們最後都因食物短缺而全個皇室都死曬
願意冒險的到了樂土後重過新生活。

整個故事係諷刺人類因為恐懼而唔想改變任何的現狀
寧願等待一個根本唔會出現的神蹟打救自己
最後只係死路一條，
很有意思的小說，而最有意思的一點係故事道出
改變的風險往往都比坐以待斃的風險為低。
呢本係我近年看過的書中最有意思的一本。


Herman Yeung


連結 Link:   好書 ‧ 靴推介

連結 Link:   Herman Yeung Blog 主目錄

好書‧靴推介 - 漫畫貫通世界史 金相勳 著

寫世界歷史的書有好多
以漫畫形式的都有好多本
但呢本真係高質素好多
因為係中文版的緣故
我初初以為作者係台灣人
原來係韓國人
呢本書最大特色係將各國的歷史一齊講
嚮香港的教育制度，中史同世界歷史都係兩科
世界各國的歷史分開讀就無法解釋好多歷史事件
我之前都睇過另一本書
佢講過中國有些時期，邊界有時受匈奴滋擾特別多
單睇中史係唔會明白個原因
但同外國歷史一齊睇
就會發現因為歐洲有個國家坐大
開始出兵攻打匈奴
令匈奴被迫東移，慢慢迫近中國
所以匈奴打中國係因為唔夠D歐洲佬打
所以我都覺得世界歷史唔可以分一個國家一個國家咁讀
一次過睇先睇到全局。

P.S. : 呢個系列其實係有5本
呢個係第一冊，我睇完好想買其餘的冊數
但其他冊數原來未出 >.<
據書中介紹，其他冊數會於2016年12月前出
好期待﹗

Herman Yeung


連結 Link:   好書 ‧ 靴推介

連結 Link:   Herman Yeung Blog 主目錄

好書‧靴推介 - 數學之書 (時代出版) 作者︰柯利弗德．皮寇弗

呢本書仲有個兄弟叫 "物理之書" 
我暫時只係睇左 "數學之書" 
但真係好好睇
佢係講由公元前一億五千萬年至今
大約 250 件數學突破的事件
當中每個事件都只係講一至兩頁
你預左唔深入，但係大大小小的數學突破都講到
我有一半以上未聽過
亦現實，有唔少亦都睇左都唔太明
近代的數學發展好多都好抽象
e.g. 威克斯流形 果D，真係好難想象
而我睇得明的，我揀左D得意D的
自己再上網深入 search 下
進修一下，所以我之前都有幾個 topic 
我都有再深入研究都覺得幾得意
例如︰
(1) Game of Pig - sixes (豬頭滿江紅)
(2) 紐康伯悖論

世界的知識博大精深
有人問我拍我想拍的教學片會拍到幾時
我可以話連埋我一路學一路拍的
拍到我65歲都拍唔曬
如果大家對數學有興趣
有機會都睇下呢本書
之後睇埋 "物理之書" 再出 好書‧靴推介

Herman Yeung


連結 Link:   好書 ‧ 靴推介

連結 Link:   Herman Yeung Blog 主目錄

好書‧靴推介 - Herman Yeung DSE 數學科攻略天書系列 Herman Yeung & Shan Ip 著

我今日突然發現我介紹左咁多本好書
竟然無介紹到我地自己出的好書
書的內容係咩，詳細大家可以自己睇

http://hermanutube.blogspot.hk/2016/02/herman-yeung-maths-core-youtube.html

我簡單介紹下，11本天書係集我地多年教學經驗
將 HKDSE Maths Core 的所有會考的技術
輯錄成呢個系列的書
當然亦配合超過 100小時 YouTube 的教學片段

https://www.youtube.com/user/hyhermanyeung/playlists?view=50&shelf_id=13&sort=dd

而我今次呢篇野係寫呢批書的出世過程
我地 2003 年開始做補習社
剛出黎做補習的時間，筆記當然係黑白印刷
而我地著眼點除左內容方面
還要顧及 binding 的問題
一本書你可以用釘裝同埋膠裝兩種形式去 binding
釘裝者就係用兩口釘打穿 A3 紙而做出對摺後 A4 書的情況
但要將釘打穿紙，部機要夠力，而釘亦要夠硬
所以一般坊間都只係打穿20張紙
但要留意，筆記封面一般都會較硬、較厚
所以你可以打穿的不夠20張
而機器呢D野，你真係唔好信佢的說明書
佢話上限20張，新機首2日係做到
好快就會因機件折舊做唔到
所以一般釘裝頁數上限為60版
除4 (因為一張A3紙底面係有4版A4) 就係15張紙
加封面已經好盡
我地十幾年的生涯中有一半左右的時間係自家式生產
以呢個頁數打，大約打20本會衰1本
衰的原因可能係打唔入或者 jam 釘
如果係釘裝機 jam 釘，就只係要拆翻粒釘出黎
但如果係影印機 jam 釘就大獲
因為佢出一本 booklet 的過程係有如一條生產線
佢同一時間唔同位置做緊唔同的工序
可能佢出口係釘緊，但前面係印緊就15、14、13、12張紙
如果出口 jam 左，部機就會停，
因為我地係高速機的緣故
部機一停，所有印緊的紙就會撞埋一齊而 jam 曬
好彩的就可以用3分鐘清翻翻D紙出黎攪掂再行機
唔好彩的，即係清唔乾淨D紙屑
你再 run 部機又 jam
可以 jam 你三十幾次最後要 call 師傅先攪得掂
唔想爆獲次數咁多，就唯有將版數再降
由60頁降到廿幾頁，jam 的次數會減低好多
可能一日到黑都無事 (當然果日係要包埋係黃道吉日先做到)
所以要出百幾版紙的筆記，就要被迫散開幾本
學生用得唔太方便

後期，有人引進另一個技術，膠裝書
呢個技術係要一部比影印機再大部D的機
將本來散開的紙，利用熱熔左的膠
膠實書脊，呢個技術我睇左好多年
最後都係無用到
因為膠裝機的科技其實唔太成熟
好多時出品用的時間，揭多兩次就會甩頁
就呢個問題，我同賣呢部機的 sales 傾過
佢話要高質素就要再大部D，而且貴好多的機
以我地補習的產量，相信支付唔到呢個開支
再後期我地知道有外判公司做膠裝，質量可以提高
但係要山長水遠運一批未膠的紙過去
膠完再運翻黎，好唔方便之餘，佢地要求的量和價都非常高

到最後，我地決心將自己的筆記以出版的形式印刷
呢個決定當然面對好多的問題
無論係資金的動用、倉庫的管理都係有好大的問題
但最最最大的問題係彩色設計
呢批書之前，我地其實嚮舊制已經出過關於 A.Maths 及 Pure Maths 的全彩書仔
當時亦都係要面對設計問題
凡有問題，最簡單的做法係外判
用錢解決唔洗煩，但係呢個正正係我地惡夢的開始
我地當時要趕 6 個月後出到 2 本書仔
內容全部都做好曬，亦都俾曬D料一位 designer 進行 design
佢話 3 個月攪得掂，我地信佢
過左 2 個月左右，我地問佢做成點
佢話佢公司的工作繁忙，未開始過
我地加錢俾佢叫佢做快D
3個月後再問佢，佢話發燒所以未開始
我唔知咩燒可以發一個月
4個月後再問佢，佢話做左少少
我地發現大獲，印都要時間，個 designer 一拖再拖
我地可能出唔切俾學生
留意學生係當時應屆的中五 additional maths 同埋 中七 pure maths 的學生
你斷唔可能叫佢地考完先翻黎拎
所以我地即時搵多幾間設計公司幫手處理呢單野
間間都話做唔切，最後我地搵到一間話做得切
就開天殺價，果次出的書之成本，每本都係正常成本的十倍
但無辦法啦，我地應承左同學會送
(如果賣的話，我地一定會放棄，因為真係蝕大本)
我地照做，而肯俾錢都不等如佢地會幫你趕
最後阿珊要不停上佢公司開埋部電腦幫手一齊做
先啱啱好出到貨
果次的經驗令我地對 designer 同 design 公司有一個幾差的印象
痛定思痛，我地唔想再貼錢求人
我地自己走去學，我地先去一間學設計的學校上堂
唔開名免得好似同人宣傳，
我地上左共24小時的課程 (當然分開幾日上)
學左 photoshop, AI, indesign, flash 少少的入門
之後我地裝左個正版的軟件，幾千銀
講正版唔係想話自己正義，而係好多功能只有正版做到
所以裝左個正版
之後自己試下學到的技術
我同阿珊兩個去學，對於過目不忘的阿珊與過目即忘的我
我好似除開著個 program 外已經唔知可以有咩作為
阿珊一路試一路試，期間我地都用過其他 designer 
佢地主要只係幫我地畫公仔
即係而家天書咪見到 herman 有唔同動作果D
之後就由阿珊慢慢砌
我地第一轉係砌一批 A5 size 的全彩天書仔
送俾第一屆的 DSE 學生
內容較少，因為 A5 版面細而且最後總頁數無而家大書咁多
但已經夠我同阿珊做到嘔
我負責出題目及內容而阿珊就做 design 砌本野出黎
當時我地真係夠膽識
未做就應承會送，
終於個個月追個期追到好多時通頂幾晚先攪得掂
好得意，你愈趕，上天就會同你開玩笑
例如你會遇到紅假令你要更早出稿先印得切
呢個遊戲都玩左幾次
但上天都好好，最後每次都俾我地趕到
做到第一批細書後
我地想將細書的內容結合我地堂上教的技巧、demo、專欄
做出一批 A4 size 的全彩天書出黎
諗呢個念頭只需3秒，換黎的係一整年的生死時速 again
就係咁，阿珊就接近全職做左 designer 做左 24 個月
當然，第一批的天書係有多少 bugs
所以再之後第二批時，阿 shan 又要再做後期修改的工作
一直到而家呢批書
有好多同學問我，我地的天書會否 update
其實每次賣曬果批貨再印時都會有不同程度的 update
而 update 亦會免費 send 翻俾果年買左的同學
呢個過程我地會不斷咁做
而阿珊呢個 designer 的工作亦會不斷
整個過程教識左我地一樣野
求人不如求己
我地的天書如果全部外判要幾多錢？
有行內人做過類似的配套，自稱千萬打造
可能佢俾人搵笨
但係全部外判千幾頁彩色設計相信都要近百萬。


Herman Yeung


連結 Link:   好書 ‧ 靴推介

連結 Link:   Herman Yeung Blog 主目錄

好書‧靴推介 - 豐田文化 - 複製豐田 DNA 的核心關鍵 傑弗瑞．萊克 (Jeffery K.Liker)、麥克．豪瑟斯 著

近排睇到新聞話日本經濟不景
好多大型電器品牌俾中、台資金收購
目的都好明顯，買電器大家都會信日本品牌多於中國
因為成龍講左句︰中國的會爆炸
所以今次難得日本人水緊，中、台資金借機收購其品牌
但係收購左品牌後，是否真的能夠將整個優勢收歸旗下呢？
我上年書展買到呢本書
"豐田文化 - 複製豐田 DNA 的核心關鍵"
買佢的理由係一本573頁的書
竟然只售 HK$29，心諗買黎墊煲底都底到爛
買完之後發現內容都唔係差
(不過老實，因為本書太厚，我都只係睇左一半)
而佢的內容係講豐田的文化係一個好優秀的文化
由於都成1年前睇，只係記得幾個重點
第1，佢會鼓勵所有員工，包括低級的員工提出問題
例如︰一條生產線，由源材料到做好一架車
中間可能涉及一個好長的工序
而當可能第175個工序的員工發現某粒螺絲鬆左
佢都可以搖一個鈴，一搖之後，整條生產線會停曬
所有高級的員工會到那位搖鈴的員工中研究發生咩事
從中了解及解決可能之前某個程序出錯的位置
加以改善，而且會於第二天的開會，公開表揚那位員工
第2，員工中各人都會幫助後輩成長
待員工成長到合適的經驗時會加以提拔
所以員工的歸屬感好強
而每人都好願意幫助公司偵察潛在的問題
因為車的生產，安全係好重要
要是某個工序出現好細微的出錯
都可能會造成交通意外及公司都可能面對好龐大的訴訟問題
所以豐田的文化做就一個好好的環境讓員工及公司一齊成長
而豐田面對的最大問題係
呢個文化只能於日本行得到
豐田試過於世界各地設立類似的生產線
派出資深的日本員工加入當地的員工
企圖製造相同文化的時間，發現外國根本行唔通
好似香港，我之前做果間公司
絕大部分的員工都係少做少錯、唔做唔錯
如果真係好似豐田文化咁，有員工見到問題搖鈴
大家就會抱怨為何要停左條生產線攪到自己遲放工
第二日開會時，老細亦會表面表揚佢
但其實係將果個員工擺上枱
將遲放工的責任射波俾呢位員工
等其他員工玩針對，迫走多事的員工
所以今次中、台收購日本品牌
其實只能收其 "形"，不能收其 "實"
所以相信呢個收購計劃的唯一用途係
"徹底摧毀對手品牌" 而矣。


  Herman Yeung


連結 Link:   好書 ‧ 靴推介

連結 Link:   Herman Yeung Blog 主目錄

好書‧靴推介 - 新道德 (說真話的勇氣) 北野武 著

一本我最近買睇左一大半的書
係一位日本名星 北野武 出的一本書
內容批判關於 "道德" 呢個議題
曾經我睇過黃子華的楝篤笑中講過類似的說話
凡評論道德的人就會被視為 "不道德"
但北野武大膽評論，見解亦非常獨特
我最記得係佢講 "新龜兔賽跑" 的故事

###########################################
有一日
龜︰「兔仔，我地黎賽跑啦。」
兔︰「唔好意思，我無時間同你賽跑，bye !」
兔仔講完就跑左上山
沒得賽跑的龜好無癮咁嚮路邊訓著，
無幾耐，兔仔跑翻黎
兔︰「龜你唔可以嚮度訓 !」

龜好開心就講︰「兔仔，你肯同我賽跑啦。」

兔仔就答佢︰「唔係呀，只係呢帶都俾我買左，你要嚮度訓就要交租啦 !」

############################################

作者係想講好多童話故事只係老點小朋友

只要努力、勤奮不懈就會成功

已經變成一種幻想

認真的龜只會淪為聰明的兔之食物

行前人的路係方便、無需創新

但可惜世界會變，變化左的世界仲容唔容納到行舊路的人？

呢個觀點我嚮 "夢想．不盜" 中睇過

呢本書又有呢個觀點，

其實呢本已經係我睇到的第十幾本講呢個觀點的書

似乎世界各地的人都開始重新審視舊有果套是否可以繼續令人類可以得到自己應得的

而世界各地有識之仕紛紛都提出

而家絕大部分的資源已經掃歸邊

好少的人擁有絕大多數的資源

而無財無勢的就要好好理解如何於新時代處世

北野武呢本書就係想提出呢一點

佢覺得學校中所講的道德係荒謬、而且不合時宜

當成年人教小朋友不要打架的同時

成年人卻打扙

當成年人教小朋友不要 "以大斯小" 時

國與國之間卻以 "以大斯小" 的原則運作

好多好荒謬的道德標準成年人做唔到

卻要小朋友遵守

其實呢本書的亮點太多，不能一一盡錄

好多的知識、觀點我係第一次聽，

例如北野武提出道德於古代的原意係為左人類唔想絕種而建立

而握手呢個好似係表達禮貌的動作

原來原意係想表示自己手中沒有暗藏武器的意思

真係學到好多野

大家有興趣就去搵黎睇下啦

Herman Yeung


連結 Link:   好書 ‧ 靴推介

連結 Link:   Herman Yeung Blog 主目錄