學生會

2012-08-14

近日見到 Facebook 度有好多同學仔攪緊學生會，
回想好多年前我地都攪過學生會，
屈指一算都已經係十幾年前的事。 
當時完全基於學校阿 sir 的老點，
話攪學生會有助升大學先至攪 
(後來入左大學，教授先話其實無咩用)，
果陣我係文書，而阿珊係福利。 

基於我地英明的主席係一個好 hea 好 hea 的人，
基本上我地學生會都係奉行少做少錯的政策，
原則上我係攪過一次常識問題比賽同埋每個星期的開會做份會議紀錄外，
我都好似無咩貢獻。
攪左成年學生會，
唯一俾到我的係我中七果年高考中化出左會議紀錄，
因為有幾十次的訓練從而呃左個作文 A 翻黎。 

仲記得入左學生會後，先至聽人講，
話每一年的學生會主席都係果年的第尾以及會於中六留班 
(選前校方好巧妙地無講過)，
可見我地之前的師兄係幾咁熱血，而我地果屆？
我們偉大的主席都係留班，死因係佢自己成日唱 K，
唔太關學生會事。
我地學生會 hea 的事蹟亦震撼全校，亦做到薪火相傳，
由我地果年開始，一年 hea 過一年，
我地師弟的一屆之主席開始，亦都打破左留班的毒咒，
因為佢地原則上除左選舉果個星期有出現外，
其餘時間佢地都係微服扮平民百姓，咩都無攪過咁摕。 

其實攪左成年，
學生會最大的問題係學校每年只係收每位學生十蚊咁大把，
全校收左皮幾野就叫要學生會攪全年活動，要夠洗其實好難，
年年都要唔知嚮邊度籌錢先攪得掂。
而我地果年？基於我地主席明白財政困難而決定與民休息 
(即係所有要多少少錢的活動都唔攪) 
我地好威打破左有學生會以來的一個創舉，
我地果年係有盈餘。 

呢個就係我地的青年，相對於而家，
大家又要學琴、又要學跆拳道、又話要參加咩團體、咩表演，
我地果陣的確多好多時間做自己的事，
某程度上讀書時間比呢個時代多得多。
但如今教育改革，倡以多元發展其實係多餘發展，
你要個學生訓練領導才能的同時，
你無法於未來確保提供到一個領導的職位俾佢，
咁你的訓練有何用？
而香港的名校要個學生懂琴棋書畫、十八種兵器，
於未來職場又有何用？ 

我地果個時代的人的確唔識咁多野，
但係強一樣足夠我地搵到食其實已經夠了，
我有位同期的同學中學時學小提琴，
而家唔係咩表演級數，但係剩教人琴已經可以皮幾兩皮，
佢學歷唔高但收入穩定。 
與多元發展相比，我都係覺得從前的教育制度好一點。

Herman Yeung



連結 Link:   Herman Yeung 的其他 blog

連結 Link:   Herman Yeung Channel 主目錄