吉爾布雷斯猜想 (Gilbreath's conjecture)

列出所有質數，將所有相鄰的數目求出
相差的絕對值 (Absolute value)
[Absolute value 絕對值︰即將減出黎的數必然係正
絕對值 (5) = 5;  絕對值 (-6) = 6 ]
之後重覆再將第二行的所有相鄰的數目求出
相差的絕對值 (Absolute value)
再做再做，一直做落去
你會發現除左第一行，每一行的第一個字都係1字
2, 3, 5, 7, 11, 13, 17, 19, 23, 29, 31, ...
1, 2, 2, 4, 2, 4, 2, 4, 6, 2, ...
1, 0, 2, 2, 2, 2, 2, 2, 4, ...
1, 2, 0, 0, 0, 0, 0, 2, ...
1, 2, 0, 0, 0, 0, 2, ...
1, 2, 0, 0, 0, 2, ...
1, 2, 0, 0, 2, ...
呢個就係 吉爾布雷斯猜想 (Gilbreath's conjecture)
所謂猜想，即係到而家都未証明為必定正確
的一個講法
我用 excel 試過一輪

至今，已經有人試過將首 340,000,000,000 個質數都係有效
但始終沒有人可以做到一個有效的証明

[P.S. Excel 中你可以打 =ABS(B1–A1) 的指令落去
再拉佢開去就會計到
詳情可睇下面的片。]



Herman Yeung


連結 Link:   Herman Yeung 的其他 Blog

連結 Link:   Herman Yeung Blog 主目錄

Herman Yeung - DSE 數學 A 天書 - 第1堂 07 (round off 捨入5) - Further Explanation

題目係 12.46 < h < 12.53 即係有好多個可能
12.4601, 12.4602, 12.4603, ...., 12.5299
而當佢地 correct to 1 sig fig 時
分別會變成
10, 10, 10, ..., 10
所以 A 錯

12.4601, 12.4602, 12.4603, ...., 12.5299
而當佢地 correct to 2 sig fig 時
12, 12, 12, ..., 13, 13, 13
有機會12、有機會13
所以你硬要寫12就未必啱，當錯

12.4601, 12.4602, 12.4603, ...., 12.5299
而當佢地 correct to 3 sig fig 時
12.5, 12.5, 12.5,... , 12.5, 12.5
所以C係啱的答案

12.4601, 12.4602, 12.4603, ...., 12.5299
而當佢地 correct to 4 sig fig 時
12.46, ..., 12.47, ...., 12.48, ...., ..., 12.53
好多個可能性
所以你硬要寫12.50 就未必啱，都當錯


連結 Link:   Herman Yeung 數學 (必修) Maths Core 的 YouTube 課程


連結 Link:   Herman Yeung Blog 主目錄

好書‧靴推介 - 漫畫貫通世界史 金相勳 著

寫世界歷史的書有好多
以漫畫形式的都有好多本
但呢本真係高質素好多
因為係中文版的緣故
我初初以為作者係台灣人
原來係韓國人
呢本書最大特色係將各國的歷史一齊講
嚮香港的教育制度，中史同世界歷史都係兩科
世界各國的歷史分開讀就無法解釋好多歷史事件
我之前都睇過另一本書
佢講過中國有些時期，邊界有時受匈奴滋擾特別多
單睇中史係唔會明白個原因
但同外國歷史一齊睇
就會發現因為歐洲有個國家坐大
開始出兵攻打匈奴
令匈奴被迫東移，慢慢迫近中國
所以匈奴打中國係因為唔夠D歐洲佬打
所以我都覺得世界歷史唔可以分一個國家一個國家咁讀
一次過睇先睇到全局。

P.S. : 呢個系列其實係有5本
呢個係第一冊，我睇完好想買其餘的冊數
但其他冊數原來未出 >.<
據書中介紹，其他冊數會於2016年12月前出
好期待﹗

Herman Yeung


連結 Link:   好書 ‧ 靴推介

連結 Link:   Herman Yeung Blog 主目錄

好書‧靴推介 - 數學之書 (時代出版) 作者︰柯利弗德．皮寇弗

呢本書仲有個兄弟叫 "物理之書" 
我暫時只係睇左 "數學之書" 
但真係好好睇
佢係講由公元前一億五千萬年至今
大約 250 件數學突破的事件
當中每個事件都只係講一至兩頁
你預左唔深入，但係大大小小的數學突破都講到
我有一半以上未聽過
亦現實，有唔少亦都睇左都唔太明
近代的數學發展好多都好抽象
e.g. 威克斯流形 果D，真係好難想象
而我睇得明的，我揀左D得意D的
自己再上網深入 search 下
進修一下，所以我之前都有幾個 topic 
我都有再深入研究都覺得幾得意
例如︰
(1) Game of Pig - sixes (豬頭滿江紅)
(2) 紐康伯悖論

世界的知識博大精深
有人問我拍我想拍的教學片會拍到幾時
我可以話連埋我一路學一路拍的
拍到我65歲都拍唔曬
如果大家對數學有興趣
有機會都睇下呢本書
之後睇埋 "物理之書" 再出 好書‧靴推介

Herman Yeung


連結 Link:   好書 ‧ 靴推介

連結 Link:   Herman Yeung Blog 主目錄

紐康伯悖論

2016-06-27

人性大考驗︰
一個天使，放兩個盒 (A, B) 嚮你面前
A 係透明，裡面有 $10萬
B 係不透明，裡面有機會係 $100萬、或者係 $0
你有兩個選擇︰
Choice 1: 只取B
Choice 2: 取 A 及 B
你會點揀？
.
.
.
STOP
天使嚮你未揀之前
佢再講︰其實我一早已經預測左你今日的選擇，
如果我預測你選 Choice 1，我就會放 $100 萬入B
相反我預測你選 Choice 2，B 的就會放 $0
(而據傳說，天使的預測係百發百中)
講完左之後，天使走左
兩個 Choices 嚮你眼前，你會點揀？
.
.
.
.
.
.
.
.
.
.
.
.
.
如果你相信天使，即係 Choice 1 的回報係 $100 萬
而 Choice 2 的回報係 $10 萬 + $ 0 = $10萬
咁應該揀 Choice 1
.
.
但係天使已經走左，盒中的內容應該唔會變
即係無論天使的預言係咩都好
Choice 2 一定比 Choice 1 多 $10萬
有錢無理由唔攞，所以應該揀 Choice 2
.
.
.
兩套講法都好似有道理，無標準答案，但你會點揀？
呢個問題係叫 “紐康伯悖論”


Herman Yeung


連結 Link:   Herman Yeung 的其他 Blog

連結 Link:   Herman Yeung Blog 主目錄

手機放米缸

2016-06-26


中三、四、五的同學考完試未？ 
就黎放暑期好好 plan 下暑期D時間點用 
除左做功課、溫書後 
有時間真係買翻一本半本非學術的書睇下 
學多D新野，書其實可以唔貴 
只要大家吼下D平價書 或者書展 $100 / 7本果D 
又或者去圖書館借閱 夠大家睇又唔貴 
可能大家會覺得十幾蚊本書點會係好書 
我想講我睇過一本書 佢話外國有間好大的出版社 
將一批賣到好平都無人要的書 搵人幫佢改個新名、新封面後 再推出街賣，賣貴好多銷路可以多好多 
咁即係大多數買書的人都只係睇書名去決定 
咁倒轉黎諗，即係賣到好平的書唔代表係質素差 
可能只係書名或者封面唔夠吸引 
所以大家俾少少時間去揀下 可能會有唔少好野 
另外，有人都問過我，邊有時間睇咁多書 
呢個問題我最近有個好得意的經歷 
因為我部手機 touch screen short short 地 
根據路邊社的消息係因為天氣潮濕所引致 
解決方法係將手機放入米缸48小時吸濕 
有科學精神的我就照做 而個48小時，
因為無手機在手的緣故 覺得成個人都醒左 
思路清晰左，當然開始時會比較無聊 
但多左時間睇書及吸收力都大左 
我覺得大家出生於手機的年代 可能已經被佢沒埋左好耐 
今日試下放部手機入米缸 
你會發現多左好多時間去睇書 IQ 高左、人靚左、行路都快左 (P.S. 48小時後攞翻部手機出黎 touch screen 的問題
係無變過 路邊社果然係老點的﹗﹗﹗)

Herman Yeung



連結 Link:   Herman Yeung 的其他 Blog

連結 Link:   Herman Yeung Blog 主目錄

Game of Pig - sixes (豬頭滿江紅)

無意中見到隻 game 叫 Game of Pig - sixes

見過書中介紹中文名叫 "豬頭滿江紅"

https://nrich.maths.org/1258

玩法好簡單，輪流擲2粒骰
每一個回合中，如果2粒骰都唔係6
所得的點數就會記在中間
你有兩個選擇，一係繼續擲
如果仍然無6，所以得點數會累積
直到你話停

那個回合的分數就會加入你的分數

之後會輪到你對手擲
但擲的過程出現一隻6

哪個回合的得分變成0

同時亦都輪到你的對手擲

但如果擲到2個6的話

你的總分會變成0

而任何一方首先分數大過或等如100為之勝

玩呢個遊戲的重點係

貪心D擲多幾次先 STOP
定係保障D，一有多少斬獲就走

我做左少少的分析

大家都可以俾下意見

如果擲到2個6，一切都要由頭黎過

所以決擇 “繼續擲” OR “STOP” 時

可以 skip 左呢個情況

所以當係只有 35 個 cases

究竟博唔博得過？就要睇以下的期望值

當你手中累積左 X 分

如果你擲到以下各 cases 會有不同的回報

(1, 1)    2

(1, 2)    3

(1, 3)    4

(1, 4)    5

(1, 5)    6

(1, 6)    -X

(2, 1)    3

(2, 2)    4

(2, 3)    5

(2, 4)    6

(2, 5)    7

(2, 6)    -X

(3, 1)    4

(3, 2)    5

(3, 3)    6

(3, 4)    7

(3, 5)    8

(3, 6)    -X

(4, 1)    5

(4, 2)    6

(4, 3)    7

(4, 4)    8

(4, 5)    9

(4, 6)    -X

(5, 1)    6

(5, 2)    7

(5, 3)    8

(5, 4)    9

(5, 5)    10

(5, 6)    -X

(6, 1)    -X

(6, 2)    -X

(6, 3)    -X

(6, 4)    -X

(6, 5)    -X

因為 (6, 6) 出現時，會由頭黎過

所以決擇時可當作已知唔係呢個情況

每一個出現的概率為 1/35

Expected return 期望回報

= 1/35 (2+3+4+5+6-X+3+4+5+6+7-X+4+5+6+7+8-X

+5+6+7+8+9-X+6+7+8+9+10-X-X-X-X-X-X)

= 1/35 (150 – 10X)

如果呢個係正數就玩得過

相反就玩唔過

所以 X < 15 的時間就要繼續擲

相反 X > 15 的時間就要停收左分數先

當 X = 15 時，擲多次與否從期望值計算中覺得無分別。

連結 Link:   IQ 題 (主頁)

連結 Link:   Herman Yeung Blog 主目錄

文言文

(a)   孫子兵法 
            01 始計篇
            02 作戰篇

連結 Link:   數學天書 訂購表格及方法

連結 Link:   Herman Yeung Blog 主目錄

孫子兵法 - 02 作戰篇

連結 Link:   數學天書 訂購表格及方法

連結 Link:   Herman Yeung Blog 主目錄

孫子兵法 - 01 始計篇

下一篇︰作戰篇

連結 Link:   數學天書 訂購表格及方法

連結 Link:   Herman Yeung Blog 主目錄

好書‧靴推介 - Herman Yeung DSE 數學科攻略天書系列 Herman Yeung & Shan Ip 著

我今日突然發現我介紹左咁多本好書
竟然無介紹到我地自己出的好書
書的內容係咩，詳細大家可以自己睇

http://hermanutube.blogspot.hk/2016/02/herman-yeung-maths-core-youtube.html

我簡單介紹下，11本天書係集我地多年教學經驗
將 HKDSE Maths Core 的所有會考的技術
輯錄成呢個系列的書
當然亦配合超過 100小時 YouTube 的教學片段

https://www.youtube.com/user/hyhermanyeung/playlists?view=50&shelf_id=13&sort=dd

而我今次呢篇野係寫呢批書的出世過程
我地 2003 年開始做補習社
剛出黎做補習的時間，筆記當然係黑白印刷
而我地著眼點除左內容方面
還要顧及 binding 的問題
一本書你可以用釘裝同埋膠裝兩種形式去 binding
釘裝者就係用兩口釘打穿 A3 紙而做出對摺後 A4 書的情況
但要將釘打穿紙，部機要夠力，而釘亦要夠硬
所以一般坊間都只係打穿20張紙
但要留意，筆記封面一般都會較硬、較厚
所以你可以打穿的不夠20張
而機器呢D野，你真係唔好信佢的說明書
佢話上限20張，新機首2日係做到
好快就會因機件折舊做唔到
所以一般釘裝頁數上限為60版
除4 (因為一張A3紙底面係有4版A4) 就係15張紙
加封面已經好盡
我地十幾年的生涯中有一半左右的時間係自家式生產
以呢個頁數打，大約打20本會衰1本
衰的原因可能係打唔入或者 jam 釘
如果係釘裝機 jam 釘，就只係要拆翻粒釘出黎
但如果係影印機 jam 釘就大獲
因為佢出一本 booklet 的過程係有如一條生產線
佢同一時間唔同位置做緊唔同的工序
可能佢出口係釘緊，但前面係印緊就15、14、13、12張紙
如果出口 jam 左，部機就會停，
因為我地係高速機的緣故
部機一停，所有印緊的紙就會撞埋一齊而 jam 曬
好彩的就可以用3分鐘清翻翻D紙出黎攪掂再行機
唔好彩的，即係清唔乾淨D紙屑
你再 run 部機又 jam
可以 jam 你三十幾次最後要 call 師傅先攪得掂
唔想爆獲次數咁多，就唯有將版數再降
由60頁降到廿幾頁，jam 的次數會減低好多
可能一日到黑都無事 (當然果日係要包埋係黃道吉日先做到)
所以要出百幾版紙的筆記，就要被迫散開幾本
學生用得唔太方便

後期，有人引進另一個技術，膠裝書
呢個技術係要一部比影印機再大部D的機
將本來散開的紙，利用熱熔左的膠
膠實書脊，呢個技術我睇左好多年
最後都係無用到
因為膠裝機的科技其實唔太成熟
好多時出品用的時間，揭多兩次就會甩頁
就呢個問題，我同賣呢部機的 sales 傾過
佢話要高質素就要再大部D，而且貴好多的機
以我地補習的產量，相信支付唔到呢個開支
再後期我地知道有外判公司做膠裝，質量可以提高
但係要山長水遠運一批未膠的紙過去
膠完再運翻黎，好唔方便之餘，佢地要求的量和價都非常高

到最後，我地決心將自己的筆記以出版的形式印刷
呢個決定當然面對好多的問題
無論係資金的動用、倉庫的管理都係有好大的問題
但最最最大的問題係彩色設計
呢批書之前，我地其實嚮舊制已經出過關於 A.Maths 及 Pure Maths 的全彩書仔
當時亦都係要面對設計問題
凡有問題，最簡單的做法係外判
用錢解決唔洗煩，但係呢個正正係我地惡夢的開始
我地當時要趕 6 個月後出到 2 本書仔
內容全部都做好曬，亦都俾曬D料一位 designer 進行 design
佢話 3 個月攪得掂，我地信佢
過左 2 個月左右，我地問佢做成點
佢話佢公司的工作繁忙，未開始過
我地加錢俾佢叫佢做快D
3個月後再問佢，佢話發燒所以未開始
我唔知咩燒可以發一個月
4個月後再問佢，佢話做左少少
我地發現大獲，印都要時間，個 designer 一拖再拖
我地可能出唔切俾學生
留意學生係當時應屆的中五 additional maths 同埋 中七 pure maths 的學生
你斷唔可能叫佢地考完先翻黎拎
所以我地即時搵多幾間設計公司幫手處理呢單野
間間都話做唔切，最後我地搵到一間話做得切
就開天殺價，果次出的書之成本，每本都係正常成本的十倍
但無辦法啦，我地應承左同學會送
(如果賣的話，我地一定會放棄，因為真係蝕大本)
我地照做，而肯俾錢都不等如佢地會幫你趕
最後阿珊要不停上佢公司開埋部電腦幫手一齊做
先啱啱好出到貨
果次的經驗令我地對 designer 同 design 公司有一個幾差的印象
痛定思痛，我地唔想再貼錢求人
我地自己走去學，我地先去一間學設計的學校上堂
唔開名免得好似同人宣傳，
我地上左共24小時的課程 (當然分開幾日上)
學左 photoshop, AI, indesign, flash 少少的入門
之後我地裝左個正版的軟件，幾千銀
講正版唔係想話自己正義，而係好多功能只有正版做到
所以裝左個正版
之後自己試下學到的技術
我同阿珊兩個去學，對於過目不忘的阿珊與過目即忘的我
我好似除開著個 program 外已經唔知可以有咩作為
阿珊一路試一路試，期間我地都用過其他 designer 
佢地主要只係幫我地畫公仔
即係而家天書咪見到 herman 有唔同動作果D
之後就由阿珊慢慢砌
我地第一轉係砌一批 A5 size 的全彩天書仔
送俾第一屆的 DSE 學生
內容較少，因為 A5 版面細而且最後總頁數無而家大書咁多
但已經夠我同阿珊做到嘔
我負責出題目及內容而阿珊就做 design 砌本野出黎
當時我地真係夠膽識
未做就應承會送，
終於個個月追個期追到好多時通頂幾晚先攪得掂
好得意，你愈趕，上天就會同你開玩笑
例如你會遇到紅假令你要更早出稿先印得切
呢個遊戲都玩左幾次
但上天都好好，最後每次都俾我地趕到
做到第一批細書後
我地想將細書的內容結合我地堂上教的技巧、demo、專欄
做出一批 A4 size 的全彩天書出黎
諗呢個念頭只需3秒，換黎的係一整年的生死時速 again
就係咁，阿珊就接近全職做左 designer 做左 24 個月
當然，第一批的天書係有多少 bugs
所以再之後第二批時，阿 shan 又要再做後期修改的工作
一直到而家呢批書
有好多同學問我，我地的天書會否 update
其實每次賣曬果批貨再印時都會有不同程度的 update
而 update 亦會免費 send 翻俾果年買左的同學
呢個過程我地會不斷咁做
而阿珊呢個 designer 的工作亦會不斷
整個過程教識左我地一樣野
求人不如求己
我地的天書如果全部外判要幾多錢？
有行內人做過類似的配套，自稱千萬打造
可能佢俾人搵笨
但係全部外判千幾頁彩色設計相信都要近百萬。


Herman Yeung


連結 Link:   好書 ‧ 靴推介

連結 Link:   Herman Yeung Blog 主目錄

好書‧靴推介 - 豐田文化 - 複製豐田 DNA 的核心關鍵 傑弗瑞．萊克 (Jeffery K.Liker)、麥克．豪瑟斯 著

近排睇到新聞話日本經濟不景
好多大型電器品牌俾中、台資金收購
目的都好明顯，買電器大家都會信日本品牌多於中國
因為成龍講左句︰中國的會爆炸
所以今次難得日本人水緊，中、台資金借機收購其品牌
但係收購左品牌後，是否真的能夠將整個優勢收歸旗下呢？
我上年書展買到呢本書
"豐田文化 - 複製豐田 DNA 的核心關鍵"
買佢的理由係一本573頁的書
竟然只售 HK$29，心諗買黎墊煲底都底到爛
買完之後發現內容都唔係差
(不過老實，因為本書太厚，我都只係睇左一半)
而佢的內容係講豐田的文化係一個好優秀的文化
由於都成1年前睇，只係記得幾個重點
第1，佢會鼓勵所有員工，包括低級的員工提出問題
例如︰一條生產線，由源材料到做好一架車
中間可能涉及一個好長的工序
而當可能第175個工序的員工發現某粒螺絲鬆左
佢都可以搖一個鈴，一搖之後，整條生產線會停曬
所有高級的員工會到那位搖鈴的員工中研究發生咩事
從中了解及解決可能之前某個程序出錯的位置
加以改善，而且會於第二天的開會，公開表揚那位員工
第2，員工中各人都會幫助後輩成長
待員工成長到合適的經驗時會加以提拔
所以員工的歸屬感好強
而每人都好願意幫助公司偵察潛在的問題
因為車的生產，安全係好重要
要是某個工序出現好細微的出錯
都可能會造成交通意外及公司都可能面對好龐大的訴訟問題
所以豐田的文化做就一個好好的環境讓員工及公司一齊成長
而豐田面對的最大問題係
呢個文化只能於日本行得到
豐田試過於世界各地設立類似的生產線
派出資深的日本員工加入當地的員工
企圖製造相同文化的時間，發現外國根本行唔通
好似香港，我之前做果間公司
絕大部分的員工都係少做少錯、唔做唔錯
如果真係好似豐田文化咁，有員工見到問題搖鈴
大家就會抱怨為何要停左條生產線攪到自己遲放工
第二日開會時，老細亦會表面表揚佢
但其實係將果個員工擺上枱
將遲放工的責任射波俾呢位員工
等其他員工玩針對，迫走多事的員工
所以今次中、台收購日本品牌
其實只能收其 "形"，不能收其 "實"
所以相信呢個收購計劃的唯一用途係
"徹底摧毀對手品牌" 而矣。


  Herman Yeung


連結 Link:   好書 ‧ 靴推介

連結 Link:   Herman Yeung Blog 主目錄

好書‧靴推介 - 新道德 (說真話的勇氣) 北野武 著

一本我最近買睇左一大半的書
係一位日本名星 北野武 出的一本書
內容批判關於 "道德" 呢個議題
曾經我睇過黃子華的楝篤笑中講過類似的說話
凡評論道德的人就會被視為 "不道德"
但北野武大膽評論，見解亦非常獨特
我最記得係佢講 "新龜兔賽跑" 的故事

###########################################
有一日
龜︰「兔仔，我地黎賽跑啦。」
兔︰「唔好意思，我無時間同你賽跑，bye !」
兔仔講完就跑左上山
沒得賽跑的龜好無癮咁嚮路邊訓著，
無幾耐，兔仔跑翻黎
兔︰「龜你唔可以嚮度訓 !」

龜好開心就講︰「兔仔，你肯同我賽跑啦。」

兔仔就答佢︰「唔係呀，只係呢帶都俾我買左，你要嚮度訓就要交租啦 !」

############################################

作者係想講好多童話故事只係老點小朋友

只要努力、勤奮不懈就會成功

已經變成一種幻想

認真的龜只會淪為聰明的兔之食物

行前人的路係方便、無需創新

但可惜世界會變，變化左的世界仲容唔容納到行舊路的人？

呢個觀點我嚮 "夢想．不盜" 中睇過

呢本書又有呢個觀點，

其實呢本已經係我睇到的第十幾本講呢個觀點的書

似乎世界各地的人都開始重新審視舊有果套是否可以繼續令人類可以得到自己應得的

而世界各地有識之仕紛紛都提出

而家絕大部分的資源已經掃歸邊

好少的人擁有絕大多數的資源

而無財無勢的就要好好理解如何於新時代處世

北野武呢本書就係想提出呢一點

佢覺得學校中所講的道德係荒謬、而且不合時宜

當成年人教小朋友不要打架的同時

成年人卻打扙

當成年人教小朋友不要 "以大斯小" 時

國與國之間卻以 "以大斯小" 的原則運作

好多好荒謬的道德標準成年人做唔到

卻要小朋友遵守

其實呢本書的亮點太多，不能一一盡錄

好多的知識、觀點我係第一次聽，

例如北野武提出道德於古代的原意係為左人類唔想絕種而建立

而握手呢個好似係表達禮貌的動作

原來原意係想表示自己手中沒有暗藏武器的意思

真係學到好多野

大家有興趣就去搵黎睇下啦

Herman Yeung


連結 Link:   好書 ‧ 靴推介

連結 Link:   Herman Yeung Blog 主目錄

發展 YouTube 教學剛好 8 個月

2016-06-01

今日係我地發展 YouTube 教學剛好 7 個月
對於大家黎講，呢個唔係一個有咩特別的日子
但對於我同阿珊黎講，呢個已經係我地的奇蹟
行呢個計劃之前，存在住好多好多不明朗的因素
要用客觀因素去分析，呢個計劃應該行唔到今天就已經夭折左
而當我地還未有足夠的勇氣行第一步時
我地卜左兩個卦，太詳細唔講
第一個卦係話我地會聚集志同道合的人一齊
而第二個卦係話只要動機純正便可吉祥
當時我同阿珊心中存有好大的疑問
一個由幕前退守到 online 的模式
唔再同公司合作，沒有同事的情況下
如何聚集志同道合的人？
但既然第二個卦中講到之後會吉祥
我地就行出第一步
行左 8 個月，我同阿珊都感到上天一路的眷顧
工作上的問題一一都會於最後關頭解決
而沿途真係有係人好多我唔認識的人
會無私的出手幫助
之前做 economics 時
有位我唔相識的朋友 Ccn Chiu 提供左好多的提點給我
做 BAFS 時，又有而家教緊呢科的現代教育補習名師 Sharon Chan 指出我講得唔好的地方，
而今次做緊 Chem，亦有 ManHei Lo 不斷給我好多有用的資訊
其實唔止呢三位，仲有好多好多同學不斷提供唔同程度的協助、支持及鼓勵給我們
之前做左補習十幾年，坦白講，唔可以話無人幫，
但係真係加埋十幾年的總和都唔及呢幾個月多
我同阿珊好感恩
感恩在當我地能力不足時，就會有人無私的幫忙
更感恩的是當我地的平台未完善之前
大家都一樣支持我地，但仍然有好多人睇我地的片。
我知道我地而家做的未必能夠盡善盡美
但我地會盡力一一克服，尤其沿途有大家不斷的鼓勵及支援
對於未來，我預見會有更多的問題要面對
但我亦見到慢慢真係能與志同道合的人
於大家唔相識的情況下，一齊努力
呢個奇妙的過程係我同阿珊暫時人生中最有意義的一段 :)

Herman Yeung



連結 Link:   Herman Yeung 的其他 Blog

Teamwork 最強，最緊要係個 "勢"~~

2016-05-26

Teamwork 最強，最緊要係個 "勢"~~

Herman Yeung



連結 Link:   Herman Yeung 的其他 Blog

連結 Link:   Herman Yeung Blog 主目錄

數學 IQ 題真係好多都好得意~

2016-05-24

兩個鐘頭前 post 左 3 條數學題目
其實我都唔知佢係咩黎
(下面有人話好似係 HKMO 的題目，
所以暫時叫 "疑似HKMO題目" )
只係覺得真係幾難做
我做左，如果大家有更好的方法可以話我知
http://hermanutube.blogspot.hk/2016/05/iq.html
數學 IQ 題真係好多都好得意
最近我見到阿珊個姪仔玩緊一個數學的 apps
佢問左一個問題，你睇下你會唔會答錯
係填充題，填 _ 的部分，準備好就睇下面的題目，1秒要答到
.
.
.
.
.
.
.
.
.
.
.
.
.
.
.
.
.
.
.
.
.
.
.
7, _ , 9
.
.
.
.
.
.
.
.
.
.
.
.
.
.
.
.
.
.
.
我即時反應係 5 字，你呢？


Herman Yeung



連結 Link:   Herman Yeung 的其他 Blog

連結 Link:   Herman Yeung Blog 主目錄

萬年筆、化學、兩日芯

2016-05-16

做 chemistry 的 material
寫乾左第二支芯 (絕對唔係我寫得多，只係佢漏得快)
相信寫完第十二支左右會完成整個 chemistry syllabus

吸取上次 econ 片要拍兩次的經驗
今次希望可以 quality 高少少先開始拍片
但都做下訪問先
大家其實幾時考 final？
一路做 chem 的內容
一路發現唔少內容其實我以前 AL, CE 都有讀過
但係自己唔記得左好多，而家好似去左時光隧道
翻翻去 1999 年，重新再準備多一次公開試
重拾久違的記憶之外，亦感覺自己都年輕左
一路做 chem、一路都懷念以前我係學生做 lab 的日子
好懷念一大班同學，個個都做唔到個實驗結果
然後老吹點解會出唔到個結果的日子
所以早兩日，我地都企圖做一個實驗
事緣見到蘋果話有人流落海中心四天
利用保鮮紙、一個大容器、一個小容器做左個裝置
將太陽蒸發的倒汗水集結變成蒸餾水
我地就地取材，仲拍埋片講點做呢個裝置
之後我地放左個裝置出去曝曬
希望可以做到有倒汗水及集到蒸餾水
四個鐘頭後，可能係因為香港太涼爽的緣故
半滴倒汗水都出唔到，實驗失敗左 ...
呢條實驗片當然亦變成機密....

最後，賣下廣告先，數學補習課程無時無刻都在招生
$168/4堂，無論你當佢係 intensive, summer, 定係 regular
11本書，11個 playlist 包曬所有內容
一買天書，就可安在一個有 internet 的地方上堂
你想點睇、幾時睇、睇幾多、再翻睇由你話事
http://hermanutube.blogspot.hk/2016/02/herman-yeung-maths-core-youtube.html
訂購天書詳情： http://goo.gl/forms/NgqVAfMVB9)

Herman Yeung



連結 Link:   Herman Yeung 的其他 Blog

連結 Link:   Herman Yeung Blog 主目錄

花生過後有感

2016-05-12

幾天前發生的事，好多同學叫我出黎抽兩句水
可見得大家唔係太明我係一個內向、沉默寡言的人
等到今天，事情開始冷卻，我表達一下我自己的意見
首先，我真係好欣賞女事主願意鋌身而出公開真相
其原意大家真係要清晰記住
佢唔想有第二個受害者的出現
呢位女同學於過程中受到的壓力之大
但可以一一捱過，其實已經好值得欣賞
希望她可以早日忘記傷痛，重新過新生活
講翻呢件事的睇法
師生戀，我自己就極不贊成
因為每個行業都有道德操守
唔可以利用自己的專業身份開始一段關係
就正如醫生與病人都唔應該談戀愛一樣
當然，我呢套古老諗法可能大家未必 buy
但我想講就算要與老師發展到情侶關係
如果佢唔肯公開，你都預左佢有問題
有補習名師會講到話公開會損害自己的形象影響到收入
我想講佢都攞黎講
好多老師都有老婆仔女、或者女朋友，而且公開的
我出黎教書十幾年
由第一年開始，我的學生已經知道阿珊的存在
真係會影響到吸納學生嗎？
當中真係有名師利用 “單身” 黎吸學生的話
就只有套用化學名師果句︰
"可能有人實力不足，唯有走歪......可悲....."
而呢D導師的筆記封面就要寫住 “單身最強”
正如我上次直播都有講，而家世途險惡
社會上有好多暗藏殺機
凡事都要先顧自己的安全，不要太易相信初相識的人
無論對方的身份係咩都好
今次我亦見到世界真係變緊
從前大集團有財有勢係玩曬
法律面前，窮人X X
今次女事主的堅持戰勝了呢一點
我好感動，感動的是我地無財無勢的人
只係肯企硬、團結，好多的不公義事情係可以改變
最後，衷心希望女事主可以快D過新的生活
忘記傷痛的回憶。

(P.S. 燈塔的世界級公關手腕大家深感意外
而我就好意外大家點解會覺得咁意外
燈塔的處理事的手法係我見過咁多間公司中最一致的一間
大家只係唔了解佢遮)

Herman Yeung



連結 Link:   Herman Yeung 的其他 Blog

連結 Link:   Herman Yeung Blog 主目錄