暑期來了

暑期來了，我記憶中，
中四打前的暑期都係一個日頭打機，夜晚睇電視的悠長假期
當時最鐘意係暑期玩RPG，
仙劍奇俠傳、軒轅劍外傳、金庸奇俠傳、三國大戰三國、三國笑傳、...
日頭屋企無人就打機，夜晚屋企有人就睇電視，暑期就係咁過
直到有一次我病，發燒，但因為太爛玩的緣故
仍然爬起身睇我阿哥玩RPG，
(大家都知 RPG 如果 miss 左中間的劇情，之後就唔知玩咩，而我阿哥當時係玩緊我個save)
我身體好攰，但夾硬支持住去睇
忽然間，我問我自己點解要咁折墮
可以好好訓下教唔訓要咁辛苦
果次之後，我忽然討厭了RPG
之後因為太無聊，竟然去溫書
溫書其實都唔係什麼乖的表現，只係太無所事事
後來發現溫書後，自己心理上無左一種罪咎感
原來咁多年黎，日頭去打機虛度時間後，
自己身上都有一種莫名的罪咎感而不自知
當自己重回對自己有價值的事上，心理上的負擔反而輕了
一個無形的循環令我走過四年的公開試

慶幸我自己初中時爛玩，否則沒有那種強烈的心理反差令我於適當時間忽然勤力
我有時會諗，如果忽然勤力的四年不是公開試的四年
無論係早四年還是晚四年，之後的路可能已經完全唔同曬

今天我和牛牛攪呢個平台，
由拍第一條片起，到而家拍左 23,000 條片
我個心都會不停地想著工作
原因可能係因為怕果種罪咎感
但正面些諗，其實係心裡有一種使命感
我同牛牛覺得一件事係有意義就會努力去做

回想翻中四時可能都係相同
係我認為我努力讀書可以改變屋企的環境
我會理解正確的方向在哪裡，所以認真看待讀書這一件事
為了令讀書更有趣，我都會思考將讀書諗做打機的場面
打三國志，您要由一座城到攻陷幾十座城
當中都要做一連串的事，
要攪農業、商業、要招人才、徵兵、要把握時機偷襲先可能攻多一座城
所以要爆機事實都要智力和耐性
我會幻想讀書都係相同的過程
我會建立唔同的目標，要完成這些目標我會做 A,B,C,D,E
而做緊的過程可能會發現走錯路，要改變方法
有時做的事比較初期，比較無聊，就有如三國志中攪緊內政咁
讀書同打機最大的分別係
讀書成功的果實會跟住您好耐，而打機成功只係一個爆機畫面
(而家打機仲衰，根本係有課金無爆機)
直到今天，我都是用相同的幻想令自己的工作更有趣味
我同牛牛今天的三國志版圖係整個 DSE 的所有學科
而家只係攻陷左 8 科，還有很遠的路要走
攻的過程難免會有敵軍走黎叫囂
我們知道這個是敵軍無糧的徵兆
所以不會影響我士氣，反而令我地更堅定自己的路線

呢個就係我們的故事
我們分享我們的故事，係希望可以令一些還沉淪於遊戲中的同學
停一停，諗一諗，找一個真正屬於自己的戰場而奮鬥
大家加油💪