Google play 圖書 (化學天書)

早前 (2019年3月) 
牛牛設計左本 Chem (Compulsory Part) 的全彩筆記
Google Play 圖書下載連結︰ https://play.google.com/store/books/details?id=LwyMDwAAQBAJ
今天睇翻相關數據都幾開心

至今已有 2540 次下載 
(單計 Google book，未計經 blogger 直接下載的數字)
非常感謝大家支持，
我亦留意到有D同學毫無吝嗇留下評價

感謝您們
您們的鼓勵令我地更有動力去生產其他科目的全彩筆記
希望幾年後，這裡會有 Phy, Chem, Bio, M1, M2, Geo 的全彩筆記啦
其實早嚮我大學畢業無幾耐
我已經想出書，出咩書都無所謂但只係有這個目標
當時我亦上網 search 過，有些公司會幫人出書
但條件唔同，
有些大的出版社就一定唔會要我地未出過書的素人
但有一間係話，$20000，包設計及上架賣
賣到的2成為利潤
簡單條數就係您俾文字佢，佢幫您設計
幫您上架，假設您能賣出 1000 本
假設每本 $100，又賣得曬
$10萬的2成 (即 $20000) 就係您的收入
扣減翻本來的 $20000
您就無賺無蝕出到一本書可以於書局有得賣
我咁記得因為我本來都想加入呢個計劃
但剛畢業的我，錢未有、書的料未有
但到有的時間，果間公司就被踢爆係呃人的
再之後好多年，嚮英皇教育做補習
所有筆記都係黑白的，要出一本全彩的書或筆記
的確有一定程度的困難
及後發生左一件事令我同牛牛出左首4本彩色書
事緣係我轉職現代教育
因為當時現代教育的學費較英皇高
當時好多英皇的學生即使加左學費
仍願意就跟埋我地過現代教育
學生俾貴了，我們都要做翻多D野俾人
我地做左一系列的措施
包括臨考前出左一個四小時的 free course 
(這個概念後期發展出今日的一天衝刺課程)
每堂買野飲，同埋承諾臨考前出兩本彩色天書給他們
有了承諾就要開工，內容我同牛牛就絕對無問題
問題係要轉做彩色，
起初，我們聘用兼職設計師去做設計
可惜遇人不淑，被拖了好多的時間而最後沒有產品
於非常急的情況下，唯有找設計公司
對家知道我地趕，開天殺價
最後我地出左 4 本彩色天書
總代價係差唔多係我地最後一期補習課程係白做
經此一役後，我同牛牛痛定思痛
自己走左去學設計
我地報左一個 $240 學 24 小時的設計課程
(點解咁平？因為果緊係做 promotion course，只教皮毛)
我地兩人共用左 $480 究竟學左 d 咩？
我就了解左原來 AI, Photoshop, In-design 可以做到好多野
但點做我就唔記得了
但牛牛就由最皮毛開始，一路靠自己試試試
經過千錘百鍊，今天由牛牛經手的全彩天書
有數學天書A, B, C, D, E, F, G, Tips Class A, Tips Class B
M2 天書 A, B
仲有呢本化學天書
坦白講，如果這批天書要在外面設計
先唔講質素 (因為有時俾錢人賺都要睇人面色，做出黎的質素未必好)
先唔講佢會拖 (上次的經驗話我聽，設計師係一個好講心情的動物，佢玩心情可以玩死你)
如果外面做，可能係一個7位數字的費用
牛牛由 $240 的課程加一個數千元正版的 Program
就能做出 7 位數字的產品
我有時都覺得太勁了
而重點係，仲覺得識人好過識字的朋友
您先要有好多好多的錢
再加埋識人就可能會做到某些事
但識字的朋友，靠自己慢慢打造
可以製造出好大的價值而無人破壞 
呢個就係我同牛牛做左十幾年野的心得

Herman Yeung

連結 Link:   Herman Yeung 的其他 Blog

連結 Link:   Herman Yeung Blog 主目錄