今日整理 econ 的 material 時有感

Phy 的 compulsory part 已經進入左尾聲的階段
我諗連彩色筆記都會嚮大約個半月時間內完成
所以我地又開始預備我地下一個 check point
Econ 經濟，今天整理手上的資料
搵翻之前2002年教私校 econ 時的 material 
發現唔少寶藏，1990 - 2001 年的公開試試題
(當年呢批 past paper 向考試局買左千幾蚊)
加埋之後收集同埋 DSE 的題目
我諗今次攻擊 econ 呢一科應該會幾徹底
諗翻果陣教 econ，的確係一場非常急的苦戰
因為果陣本來教 econ 的教師嚮12月尾離職
我要放完聖誕假後接手，而我又堅持要由第一課開始教過
所以要於12月尾的聖誕節假期打好曬所有 past paper 及分類
(當時有4個同事幫我一齊打先打得切) 及預備教學的工作
我記得我1月份同學生講，我會由第一課教起
差唔多全班都覺得我實教唔切
您都知私校其實好自由
佢唔鐘意您，佢係可以唔上您的堂
我記得我開始教翻 opportunity cost 的時間
全班坐唔到四分一 
但之後我真係教得非常有效率
慢慢走堂的都翻黎，因為所講的課題愈來愈深佢地都想學
最後3月，全班都坐滿
我最記得放榜出成績後有個學生打俾我 (以前私校個個都有我電話號碼)
"楊生，我 econ 合格呀" (以前私校的學生係叫我 楊生)
我問佢︰咁您會考幾多分 (以前合格叫E係1分、D就2分、如此類推，A就係5分，通常問您會考幾多分就係最高果6科的總分，所以最高為30分)
佢答我︰1分
即係得我果科合格
(以前會考我只係教經濟，而教數學的係 Dick Hui)
我好替這位同學開心
您地可能唔會太明白，一間私校所收的學生
好多都係被傳統學校完全放棄的一群
佢地好多人對自己完全失去自信
雖然老實講，0分和1分對升學或就業係沒有多大的分別
但呢個1分係令一個對自己完全無信心的同學
可以對自己重拾自信
至少佢會覺得，原來佢係得的
而最重要係，我1月份先教，佢都係3個月內
嚮開始時仲要走堂的情況下得到呢個合格
所以係一種對佢的能力的一種肯定
佢好開心，我好記得
做教育最重要唔係教知識
做教育最重要係令學生有希望
對自己有希望、對前路有希望
所以我往後的教書生涯中
最鐘意教的不是名校生
最鐘意教的係一班本來都對自己無希望的人
我想佢地重燃自己對未來的希望
好多事情只要從正路去努力做，慢慢就會好
年輕人對前路不要太灰心
於合法、正途的手法上努力
一定會成功，加油

(P.S. 我於這個毫不當眼的位置出文，唔知有無人睇到，有的麻煩樓下回覆個 "有"，等我知道呢個漂流瓶有無人執到，謝謝)

Herman Yeung


連結 Link:   Herman Yeung 的其他 Blog



連結 Link:   Herman Yeung Blog 主目錄