吉祥物

以前做學生的時間，要送禮物俾長輩係一件好頭痛的事
要買到唔太貴又不失霸氣，
我地好多時會買 P 字頭或者 C 字頭的筆
呢D筆，百幾至幾千都有，我地做學生梅梅地梗係百幾果隻
但要多一份心思就可以刻埋對方個名落去
我記得中學時，我同阿珊好鍾意去一間文具店買
因為個老闆可以免費同我地刻名，仲要係徒手刻
佢開一個粗螺絲批少少的工具，插電就可以刻
佢手字就係無得頂，徒手就能刻出華康秀風體的效果
我同阿珊先後幫襯佢好多支
但記得有一次多年無去再去買的時間
老闆唔肯再幫我刻，我地話點解呀，您手字咁靚
佢話佢老左未必刻到，我同阿珊再三請求後
老闆終於出手，但可能真係老了，失左手
但個老闆最後都好好人，刻衰左果支無收我地錢
俾左另一支新我地
當時仲係學生的我地真係好感謝個老細
俾多百幾蚊唔係話俾唔起，但學生時代真係會好肉痛
果次之後，我地就無再買筆做禮物
好多年之後，我地出黎做補習時，
想做一批精品送俾學生
諗起當時呢種的禮物，所以做左一批刻有 HY logo 的筆出黎
希望同學收到可以用到著之餘，亦可以當係一種吉祥物
嚮我地細個的時間，連 call 機都唔流行的時代
身上最貴的當然唔係 iphone，
好多時最貴的就係一支 P 字頭的筆
所以我地對佢會特別珍惜，
您可以唔見一百舊擦膠都唔可以唔見佢
因為佢的價值就係一百舊擦膠
所以我地慢慢會當佢係吉祥物
我兩次的公開試、大學的 interview 都會帶住一支 P 字頭的筆
覺得佢會帶黎好運，
但當然，最鋒利的刀都會有唔見的一日
大學時期唔見左支筆之後就無左呢個習慣
所以我地做呢支 HY 筆的時間，
都希望可以為我地的學生帶黎好運啦

Herman Yeung


連結 Link:   Herman Yeung 的其他 Blog

連結 Link:   Herman Yeung Blog 主目錄