西班牙語

最近嚮 i-pad 的 apps 中，接觸到西班牙語
原來世界有4億人的母語係西班牙語
西班牙D字聽落去有D都同英文幾似
英文的 one, two, three, four, five, six, seven, eight, nine, ten
西班牙語係叫︰
uno, dos, tres, cuatro, cinco, seis, siete, ocho, nueve, diez
其實一個小朋友，學識講母語可能只係三、四歲左右
即係一個人要識講一種語言只係三、四年左右
問題就係要不斷聽
以前的要做到不斷聽已經好難
我聽過有人會嚮機場，特登搵個外國人請佢食飯
目的就係多D機會練到英文 oral
但而家你有心的話，一上 YouTube
咩國的語言都可以無限次收聽
而另一個問題，我覺得一個BB可以學語言咁快
係因為佢地無我地大人的框架
大人的世界好多規則
又文法、又句子結構、好多好多的規矩
而佢地上 playgroup 見到個外藉老師
佢講咩你咪講咩，學得自由就好快學識
我地學中文又唔見要學文法
你會唔會講︰我飯食左未？ (我真係見過台灣人學廣東話時咁樣講)
然後你阿媽話︰阿仔，係要 subject-verb-object，所以係我食左飯未呀
我地學中文，根本唔洗學規則，講開就 OK
但學英文呢，不斷有人會挑骨頭話你錯呢錯路
攪到我以前細過無曬信心
唔敢講、唔敢寫，最後就學得唔好
同樣的問題都在數學上
上次直播有同學問點學數學可以有效率D
阿珊道出一個好重要的問題
係 "信心"，
好多時同學嚮學的過程中
一睇就覺得唔識做，但係當我地單對單教的時間
我地一步一步咁問佢︰下一步你會諗咩？
佢地會全部答到我地
我地發現佢地十步，十步都識，只係心理上覺得自己唔識
大家如果都有呢個問題
可以大膽D寫出自己的諗法、做法出黎
如果果份係功課，大家可能會驚俾人話、俾人笑
但係如果只係自己嚮屋企做，無人知的情況下
放膽D去 try，try 下 try 下就會發現好多原來自己都係識
因為你自己屋企 try，唔會驚俾人笑。
呢個亦都係我地直播一個意外的收獲
我地發現，有好多同學平時唔敢問的問題
佢地都敢膽於直播問左，因為網絡世界你唔識我、我唔識你
所以大家都可以唔怕人笑咁講自己的問題
大家天南地北，咩都講，無限制
同樣道理，如果你地有唔明，Facebook 問我地的時間
可能你即使你睇開我地的 YouTube
但現實世界，我係唔識你，我亦唔會 post 出黎笑你
你可以放膽將你的諗法講出黎
可能可以改善到你的學習問題
而我自己都發現我咁多年學語言咁差
都係因為相同原因，怕錯、怕俾人話、俾人笑
所以錯過了好多 upgrade 的機會
而家的我地，可能受得打手人身攻擊太多
反而放下了唔少，錯又如何，之後再 upgrade 係最重要
所以我地做左好多非自己強項的片
試過俾人插過我地有錯
善意、惡意都有，但我地相信只要我地肯將佢地 upgrade
我地要做出一批最完善的教材只係時間問題
我地唔會放棄，大家都唔好放棄﹗加油﹗

Herman Yeung



連結 Link:   Herman Yeung 的其他 Blog

連結 Link:   Herman Yeung Blog 主目錄