訂購 Herman Yeung 數學天書詳情

2016年1月30日 星期六

節日的意義


2016-01-30

就黎又新年啦,對於呢 d 所謂節日,本來係值得高興
但近幾年好似變左質,節日新的定義係商人的一個促銷藉口
唔知大家覺唔覺每年 12 月 26 日左右
各大商場就會開始播賀年歌,賀足你兩個月
佢咁早賀您,都其實係想促銷產品
一年到黑,都搵最近的節日出黎,面係慶祝、底為 selling
不斷製造一個消費壓力
慢慢仲會發展到一 D 本來唔會慶祝的節日都會 "被慶祝"
最離譜係萬聖節,每年差唔多的時間就嚮各大商場放堆爛肉殘肢出黎
我諗香港人未變態到見到爛肉殘肢會覺得好吸引
仲有 D 會將員工打扮到成面爛曬去嚇 D 顧客
其實真係會有人驚嗎?佢地極其量都只係叫做 "核突"
用核突黎招生意咁都俾佢地諗到,
咁佢地點解唔推個 "屎節"
明年今日就係 "屎節",
各大商場會屎氣衝天,有好多屎造形的公仔會嚮你面前載歌載舞

消費意識注入後,好多節日的意義都好似被扭曲左
例如情人節為例,各大商鋪的廣告都聯手製造一個壓力
叫天下的情侶當天都要以一個不合理的價錢去慶祝一翻
我不反對慶祝,只係覺得不合理的價錢慶祝好似中左商人的圈套
特別貴的自助餐、花
而果日亦會用盡方法製造一個群眾壓力
男的唔買花,會被標籤為 "孤寒"
但女的無收到花,就要俾人笑
最後得益的都係商人

其實如果真係要慶祝,為何不能個人化一點
兩個人的情人節可以自己定為 2 月 15 日
反正 2 月 14 日亦不見得天氣特別好
2 月 15 日當天,保證自助餐會平好多之餘亦唔洗同人迫
當然,不隨波逐流的結果會係被天下人歧視
所以敢於反傳統的人不多
最終大多數都係逃不過呢個不合理的節日安排
情人節變成慶祝俾身邊的人睇
做每一件事都好似要通過唔知咩人定立的規距運行
我覺得真係要諗諗,點解我地的生活會有更多無無謂謂的規範,
如果唔理群眾壓力,其實可能會換黎更好的人生
我決定以後農曆九月十五日先買個蛋黃蘇黎賞月。

Herman Yeung


連結 Link:   Herman Yeung 的其他 Blog

連結 Link:   Herman Yeung Blog 主目錄


沒有留言: