訂購 Herman Yeung 數學天書詳情

2015年7月19日 星期日

層壓式傳銷


2012-08-16

一條存在香港幾十年的橋,騙過很多人很多錢,
尤其針對大學生/大專生。
眼見無數同學將會升為大學生/大專生,
事先提一提大家,希望可以避免破財。 

傳銷的意念原於外國,
第一家來香港而無呃人的傳銷公司叫 Axxxx (以免好似幫人賣廣告),
佢的原意係利用人與人之間的關係,互相推銷一些產品,
例如你成為佢的會員時,佢會話俾你聽某某抽濕機街價係$3000,
佢可以 $2000 俾你,你就可以賣俾身邊的朋友,
作價當然係大於 $2000 而低於 $3000,當中會員的你受惠,
而公司因為唔洗香港開 outlet 而賣平左都有賺,
買家又可以買到平貨,三家都受惠,
蝕的只是地產商(因為佢無法於交易中賺取租金)。 

這個傳銷形式於約三十年前開始興起,但亦慢慢變質,
開始有其他產品,例如健康食品、維他命丸之類的公司出現。
他們的做法改變了,佢係要會員一次過同佢買入大量的貨品,
然後自己慢慢推銷。 
相對於第一家的做法,新做法會令會員負上相當的風險,
因為佢賣唔出的話,佢係可以蝕大本。 
而當時仍有不少人參加,理由當然係過程中的利潤相當豐厚,
可惜的是,某些公司欲賺短錢,賣出的貨為次貨甚至假貨,
令會員入貨後根本無法售出而血本無歸。
而大量市民重創的另一幫兇係信用咭,
有唔少人係碌咭黎做所謂的生意,唔少人因為咁而負債疊疊。

時至今天,傳銷的發展已經係做到明昆你,你入會要俾錢,
但無貨俾你。 你的任務唔係賣貨,而係搵多幾個人入會。 
我讀大學時聽過一間公司的做法大致係咁,你入會要俾 $8000,
你搵多一個人入會,你會賺 $1000,即係你搵到 8 個新會員,
你就歸本,再搵你就賺。 佢仲有下線的制度,
你所搵的會員會係你的下線,下線再搵下線你又有得分,如此類推。
聽落真係好易賺,但係諗深一層,
其實佢的原理係你做水魚就收你 $8000,
之後拆翻 $1000 俾你上面果個,
再拆多幾百俾你上面再上面果班友,
之後 $6XXX 收歸國有,你做了水魚就會自然幫手搵水魚,
每條水魚賺 $6XXX,樹型圖式散開,
中招者可達萬計,成盤生意會賺近億。 

整個做法問題何在?
一個水魚只要搵到八個水魚就可以甩身,之後仲有機會賺,
的確無咩問題,但問題核心係水魚係有限的,香港700萬人,
有咁的錢俾你呃但又甘心做水魚的人,可能如之前所估約萬餘人,
你入會後就好似喪屍般找人吸血,被吸血的又會變成喪屍,
如此喪屍的增長速度會以幾何級數上升,
要將呢個數字由第一個變成萬餘,可能快過細菌繁殖,
慢則一年,快則半個月。
如果你成為喪屍的一天如果已達水尾,可能你未翻到屋企,
佢個老細已經收夠籌準備走佬,老細走佬了,
留下的便有三班人,
一班係 TOTAL LOSS 的人,佢血本無歸,甚至負債疊疊,
第二班係及時收支平衡的一班,佢表面上無損失,
但佢地用盡自己的人格黎騙回自己的成本,
最上的一班會係賺,早早入局,財源滾滾,
但這班人本來就係騙局的始創人,唔會係你。 

呢個係十年前的做法,今天的做法?
佢地會利用不同的形式包裝,令你覺得佢唔係傳銷,
甚至佢地可以會利用群眾壓力、威迫利誘、甚至催眠、放迷煙等下三流手段騙你的金錢。 
所以奉勸各位,最好唔好到這些所謂搵快錢的 seminar,
就算去都唔好帶信用咭,帶張廿皮過去俾佢呃盡都係廿皮。
(自己無賴野之餘,可以的話都提一提身邊的朋友 ^^)

Herman Yeung


連結 Link:   Herman Yeung 的其他 Blog

連結 Link:   Herman Yeung Blog 主目錄


沒有留言: