blogger 瀏覽量終於突破 150 萬了

Yo ~ ~ ~ ~ ~  ~ ~ ~ ~ ~ 感謝大家支持，
希望日後能更善用這個平台
同大家有更多的分享或討論
大家有與趣可以左邊 Follow by email
寫低您的 email
日後出新的 blog，可以自動 email 通知大家
呢個功能我都開左好耐
至今已有 2 名用戶登記
希望明年會有倍數的增長 ^0^


Herman Yeung


連結 Link:   Herman Yeung 的其他 Blog



連結 Link:   Herman Yeung Blog 主目錄

古文明系列 之 皮瑞·雷斯地圖 Piri Reis map

By Piri Reis - Library of Topkapi Palace Museum, No. H 1824 Bilkent University (lo res), erisi.com (hi res), Public Domain, https://commons.wikimedia.org/w/index.php?curid=345064

呢張係16世紀初土耳其海軍司令收藏的一張地圖
特別之處係張地圖有南極的部分
而南極的部分於 16 世紀時應該是被厚厚的積雪覆蓋
所以用眼無可能劃到呢個南極的地圖
要到1952年聲納探測器出現
人類才可劃到積雪下的情況據講
用現今科技畫的與這幅地圖非常相似
所以人類覺得呢幅地圖
(1) 16世紀或之前已有 聲納探測器 或更高的科技出現
(2) 呢幅地圖係由未有積雪時畫的，
而未有積雪的時期是6000年前，
所以就估計有古文明的出現
我就唔識地圖繪畫，
所以我之後講的如有錯麻煩指正
我覺得呢個講法有幾個奇怪點 首先呢張地圖，
無論紙質、畫工都唔似係高科技的製成品
如果話係古文明，
甚或有些人認為要古文明的人要用到太空科技先畫到
我覺得紙質或畫工好似唔太 match
如果現今科技畫的，
至少會有其他定位方法的標記 

第二點係，
地點上有船，
以船的形狀似係十五、六世紀大航海時代的船
亦唔似高科技的產品，如果係現今的出品
至少大型油輪都有架

咁我再修改，地型係古文明，
十五、六世紀切合其需要用當時的羊皮畫出地圖
亦畫埋當時的船
咁呢張地圖用途在哪裡
那幅南極當時已被冰封
您知佢地底的容貌有咩用處

而地圖上南極的人的衣著亦唔覺好凍
有一個講法係10000年前
當時南極反而係熱帶地區
所以有呢種衣著唔出奇
但點解人係 10000 年前，但船就係十五、六世紀呢

而且老實講，上面個海岸線是否真係如文字形容
與真正南極好相似
我真係唔識地理，但我試過睇過而家真正的南極
似唔似真係見仁見智

可能我真係唔識冤枉左佢
但識的人可否出一個清晰的比較圖
我搵過就真係搵唔到相關資料
我只係覺得好多古文明的資料都好唔多
而內容亦有些怪怪的地方
所以同大家分享研究一下 ^0^

Herman Yeung


連結 Link:   Herman Yeung 的其他 Blog


連結 Link:   Herman Yeung Blog 主目錄

波浪大師

今日睇到財經版有一篇專欄
內容大要係話如果於 XXX 上市時您投資左 $1000 美元
今天會賺多少之類的專欄
我當然沒咩興趣睇內容，因為都係馬後砲的專欄
我想講如果您於 八百伴、中巴 上市時您投資左 $1000 美元
今天您會得啖笑，因為佢地已經執笠停牌了

但呢個專欄令我諗起我以前一個教 finance 的教授
佢話佢曾經認識一個股壇高手叫 "波浪大師"
聽個名就知有到料
波浪大師話無論股市、外匯、甚至人生
都係上升三個浪下跌五個浪
或者上升五個浪下跌三個浪
只要我地把握好其走勢
自然可以從中取利
聽落真係好吸引
如果我知股票A進入上升三個或者五個浪的開端
訓身買落去，到佢差唔多進入下跌浪時就放貨
到時就真係肥過肥仔水
我地成班同學都好雀躍想了解波浪大師的理論
教授就繼續講落去
佢話佢嚮一個公眾場合見到波浪大師
有人就問佢，波浪大師波浪大師
究竟如何去數浪呢？
因為指數、股價唔係升就跌
升跌幾多才是一個浪呢？
波浪大師就語重心長話
..... 難.....因為......浪中有浪......
全班同學心中都充滿問候
既然浪中有浪，即係無人知道一隻股票係處於哪一個階段
亦無可能於投資中有利
教授跟住話，又過左無幾耐
佢有個學生翻去搵佢，話佢知佢發明左一個程式
程式裡面有一個好複雜的運算
而運算可以推出一隻股票幾時會爆升
為左簡單D，佢自己每日都會從市場中得到數據
自行分析，到佢發現有正野就係俾出一個訊號
教授半信半疑去觀察呢個 program
第一、二、三個俾訊號，教授都無買只係睇下佢準唔準
果然三個都有唔錯的升幅
教授亦開始相信呢個 program 的準確性
第四次訊號出現了，教授真係落注了
結果係大跌﹗﹗
教授自此之後就無再信過呢種系統
呢位教授在我心中係好深印象
因為佢係教財務，但佢都唔會自己投資
佢都係將錢買指數基金
年少無知的我相反於畢業後頭幾年都幾沉迷股票
結果輸多贏少，而最主要係
炒股的人其實心情已被股市所綁架
佢升您開心，佢跌您唔開心
分分秒秒都俾佢影響，所以之後我痛定思痛
cut 左個股票戶口，從此無炒股票差唔多十年了

我們做教書的，經常接觸年輕人
好多年輕人都會問如何炒股票、如何投資
我的意見就係，唔炒就必勝
可能我的學生如我從前年少時相同
總覺得自己的財經界的千里馬
就算您係千里馬，都不要將股票投資視為自己的事業
同埋不要訓身去投資一個有機會輸好多的市場上
有些股票可以十合一完又十合一再三十合一
我見過有人投資十萬買一隻股票
幾年後 cut 個股票戶口時
個職員話您隻股票經過多次十合一後只有57股
57股唔夠一手，如果幫您沽出要收 $100 手續費
但 57 股沽出只有 $28.5，
所以麻煩貼翻 $71.5 才可取消呢個戶口。
這個就是股票市場了。

Herman Yeung


連結 Link:   Herman Yeung 的其他 Blog


連結 Link:   Herman Yeung Blog 主目錄

12月尾了

大家好，眨下眼已經十二月尾
今年 DSE 的朋友，您準備好個心情去考DSE未？
我記得有一年我去一間中學講 talk
對象係一班公開試應屆的學生
都好似係咁上下月份
我一上台，我就講，對於大家黎講
有一個壞消息，有一個好消息
壞消息係 您地未開始溫書
場內二百幾個學生四百幾隻眼向我發出肯定的眼神
我相信呢種眼神係代表真係一個人都未開始溫書
而好消息係，大多數香港的考生都未開始溫書
但重點係，係時候開始了
對於數學呢一科黎講
大家可以參考我多年前的一篇文章
https://hermanutube.blogspot.com/2016/02/v-behaviorurldefaultvmlo.html
而對於整個 DSE 黎講
我覺得最重要係心態上的轉換

早幾日，我嚮 YouTube 上睇到一個加州大學的教授
向佢的學生講為何不能出貓
佢話佢已經係第6個教授講相同的議題
估計可能係因為出貓可以比較嚴重
要請出各教授教育一下
佢話，叫您地唔出貓
唔係因為您出貓會對其他同學唔公平
(雖然在拉 curve 的制度下，
有人出貓高分的確會令其他人低左分)，
但佢所話這個不是重點
因為您的出貓，不會令別人學少左野
叫您地唔出貓真正的原因係
如果出貓解決左今日的問題
日後只會在更多的事上使用相同的方法
人類一天會做好多個大大小小的決定
但這些決定絕大多數係由習慣去做
您習慣的做事模式是什麼
好多決定就會按呢個模式去做

就有如我地之前好書靴推介都講過
人的思考模式就有如滑雪一樣
當您重覆滑一個軌跡
雪地上就會留有一個深坑
滑得愈多次，深坑就會愈深
之後再滑就自自然深陷於這個軌跡
這個就是習慣
所以要避免沾上不良習慣
呢件事亦令我諗起易經
我好多年前因為拍易經 mathematics
去理解過易經64卦的少少內容
雖然易經占卜中會有64卦
即占卜者最後會於64卦中得到1卦去指示方向
但您真係細心去睇64卦的卦辭
差唔多所有卦都會強調 "堅守正道，便可吉祥"
"堅守正道" 對我幾年前的理解
認為易經講善有善報、惡有惡報、恩果循還
但人大多幾年，我覺得其實都係習慣令人有報應
我的意思係，如果您事事堅守正道
唔偷雞摸狗，自然會吉祥
但如果您試過偷雞成功，日後只會心思思去做多更多次
而且愈做愈大，小時偷針、大時偷金
當幸運之神不再降臨時就會失手被擒，此為報應
而教授所講的係
如果您今次出貓過骨，之後大過都會用相同方法去做
但出黎做野之後，唔係每件事都可以用呢種方法
最終只會令自己無路可走，最終都係要暴露自己係咩都唔識

而讀書亦係相同，習慣改變了，一切就可以改變
如果您本身已經好勤力，我恭喜您
但如果您本身就係比較懶
我建議您改變您的思考軌跡
找一個無人打擾的時間及地點
找一個小時無間斷地溫書
成功一次之後可以休息
但之後又再嘗試第二次、第三次
慢慢您會變成習慣
變成您可以長時間專注的人
呢個係果個叫做 蕃茄定薯仔時間工作法
有興趣可以去 search 下
加油﹗﹗
Herman Yeung


連結 Link:   Herman Yeung 的其他 Blog



連結 Link:   Herman Yeung Blog 主目錄