蘇格拉底 提倡 的 "無知的知"

放榜事件慢慢告一段落  
我又重回 chem 的懷抱 
重回之前我睇左幾本書 
第一本係我直播都有介紹的 "柏拉圖的理想國" 
當中主要講係 柏拉圖 的老師 蘇格拉底， 
睇左百幾頁之後， 
令我又執起之前已經睇完但無啦啦又睇翻的 
"人生，有趣300倍的方法"， 
呢本係由日本哲學家 小川仁志 寫的， 
無獨有偶，呢本書的第19頁就係講蘇格拉底。 
當中提到 蘇格拉底 提倡 "無知的知"， 
所謂 "無知的知" 就係 當您唔知的時間就誠實地承認自己唔知， 
再同人地討論時就可以慢慢將真理辯明， 
但蘇格拉底覺得好多人係唔知扮知， 
令自己無法得到進一步增長。 
而呢個年代就更甚，好多人係唔俾唔知的人講野 
凡唔係專做果範的，講就係踩過界及予以討伐 
窒礙社會進步。 聽完呢個偉大的哲學家的講法後 
我自己都對自己的工作有所檢討 
而家我會對我所睇到的、會想辦法行多一步 可以了解多D就了解多D 
例如尋日，我睇 "原子有話要說 - 元素週期表" 中 
我睇到原來氮氣可以用黎做冷卻劑 
可以將新鮮玫瑰做成 "急速冷凍玫瑰" 再 search 之下，
原來 冷凍玫瑰 係 比利時出 係利用冷凍技術，
延長並保留原色，約維持半年～1年。 之後再睇多D，
又有人話用呢個冷凍技術 冷凍條香蕉黎表演魔術 
因為冷凍後的香蕉硬度可以作槌仔用， 呢D真係幾得意。 
其實 DSE 的課程都可以好過癮 推演到好遠，
當然有人會話呢D公開試唔考喎 本來我都認為係，
但我又發現原來有 d 例子係有出過。 
例如 原子有話要說 - 元素週期表 中 的 p.31， 
佢講到一種物料叫 "鐵氟龍"， 
佢話烹調器具表面塗上鐵氟龍， 
就會具有超耐熱、表面光滑、超潑水等特性， 
我睇完之後覺得好熟、好似唔知嚮邊度見過咁， 
我 search 左好耐，
終於發現 原來係 2004 A-level chem Paper I Q4 有介紹過呢個產品 
有修 chem 的同學， 下次同您阿媽買鑊時如果見到有呢個塗層， 
記得介紹呢個塗層的用途俾您阿媽， 
我諗您阿媽會感動到喊，我個仔可以咁學以至用， 
當然再之後個鑊用起上黎燶底就唔關我事啦。 
有時睇下、了解下呢 d 新野都幾得意， 
正如 小川仁志 的 "人生，有趣300倍的方法" 都講過，
生活上有機會學到新的冷知識， 係令人愉快的一種方法， 
天天都做相同的事的確好悶， 
將一 d 可能無關痛癢的知識嘗試從網上了解多 d， 
可能會為我地的生活注入生氣， 
呢個可能就係 蘇格拉底 所提倡 "無知的知"， 
好似 BB 仔咁，對所有事都好奇， 
希望知更多更深入，人生就會多好多樂趣 ^0^。

Herman Yeung


連結 Link:   Herman Yeung 的其他 Blog


連結 Link:   Herman Yeung Blog 主目錄