訂購 Herman Yeung 數學天書詳情

2016年7月1日 星期五

2016 DSE 放榜前夕



2016-07-01

仲有十幾日 2016 的考生就放榜
每年呢個時間,都有會人為自己的前途作出抉擇
當你諗好多好多的前途問題
請你靜一靜,回顧一下今年的情況
你會發現有好多突發事情會令你的選擇變質
就呢兩三日的報紙
醫療界、會計界、酒店業、零售業都有好多的問題
D問題相信三四年前係無人估到
所以當年的考生選擇自己的前途時
都係無法分析
所以選科時最重要的
唔係做大量的分析估呢科的出路是否最好
因為好多時人算不如天算
所有事都會改變
而你要明白前途係一定係光明的
你淨係諗如果你地畢業時唔係而家呢個特首
已經夠你有排開心
世界可以變,有一樣野可能變的機會不大
就係自己的喜好
選科時一定要諗下自己係唔係真心鍾意果科
坦白講,我揀科時所選的醫科、會計
其實同我的性格完全唔夾
當時只係以求財的心態去揀
好彩一科又唔到、一科入到又做唔到
先講醫生,你是否真係有相當的熱誠去救人
如果眼中只係錢,其實醫生的工作量
所面對的工作內容,的確唔係一個常人可以頂得住
一定要有相當的熱誠才能做得到自己又開心
又可以搵到食
所以一D好怕面對壓惡性工作的同學
會寧願讀藥劑好過
有同學話藥劑搵少好多
我唔會否認,因為香港無醫藥分家
但係到你讀完出黎會唔會已經分左家呢?
又或者可能你會移居其他地方工作及生活
所以眼光放得闊,可能個問題根本唔係一個問題
另外,會計行業,競爭其實都幾大
唔係話入學時的競爭,而係出黎做野之後的競爭
首先畢業生一般最想入的係四大會計師樓
呢四大的收新人人數會隨經濟環境改變而有所增減
當你入左去,你要不斷工作好多個小時
同時又要兼顧考牌
內部的競爭亦都好大
我無做過,但我見到的係我以前中大會計系的同學
有唔少入左去做四大
而家見到佢地都無做會計或者核數了
即係所謂入去大把前途其實都唔係人人做到
我想講咩呢?我想講十幾日後大家得到左個成績
唔同人可能會有唔同的煩惱
有人好多5星星諗緊讀咩神科
有人成手12諗緊重唔重讀
更多人處於 marginal case 非常徬徨
但無論係咩情況,而你又做咩決定
十年後睇翻其實都唔係咩咁重要
好多因素會變,今天人人話好的路可能幾年後好大獲
今天人人都話唔好的路日後可能會大翻身
不要太著眼於今天的決定
而係於未來的路上繼續積極向上
人生每一個時刻都係重要的時刻
唔好俾外面渲染一個什麼一試定終身的講法嚇怕你
呢個只係補習社的宣傳技倆
如果真係一試定終身,我而家就唔洗 do
我會考都 4A1B,以呢個邏輯
我唔係大有錢佬都起碼住半山啦
事實呢?我見到成績與前途真係相關性唔係咁一致
加油做好每一件事
深思熟慮每一個決定後,
就要學識相信自己、勇往直前,

加油﹗﹗

Herman Yeung


連結 Link:   Herman Yeung 的其他 Blog

連結 Link:   Herman Yeung Blog 主目錄


沒有留言: