好書‧靴推介 - 心戰(孫權) 陳禹安 著

剛又睇完第二本的心戰
(之後唔會再寫第三本，以免大家誤會我識個作者 :) )
睇左好幾日，自問睇書速度唔快的我
真係要好好睇的書先可以令我一個星期左右睇得完
呢本真係好好睇
三國︰魏、蜀、吳
好老實我真係最唔清楚吳的故事
一來羅貫中的三國演義中寫得最少
二來打機時孫權的文武將
與劉備、曹操相比，又好似無咩特色
而重點係打三國時，18X年的時間，
孫堅位置旁邊大多係吉城
派1個兵就可以霸到5、6個城
最近有人就只係得個嚴白虎兩父子
但去到23X年的年期，孫權的版圖都係咁上下大
究竟打完赤壁之後，孫權係唔係訓著左
呢本書就至少令我知道果幾十年發生左咩事
孫權由19歲接管江東，到71步先離世
中間有52年的時間
前期都只係周旋於劉備、曹操的博弈中
後期有一段好長的太平時期
本應可以有好長的時間休養生息
等魏、蜀打生打死之後執死雞
但竟然因為孫權自己的自卑而出現不斷的內耗
及最後亦因孫權立太子的失策引致更大的內耗
一個一個有用的人才自相殘殺
最後引致亡國，睇到都有點為孫權感到可惜
大家有時間可以去書局買或圖書館借黎睇下。


連結 Link:   好書 ‧ 靴推介

連結 Link:   Herman Yeung Blog 主目錄