地鐵飛

2016-02-03

今日因為無帶八達通，所以去買左兩次地鐵
而家d地鐵飛好似硬過以前好多
嚮未有八達通面世之前，所有人搭地鐵都要買地鐵飛
當時的遊戲規則有兩個，一係你就每次買你要用果程的地鐵飛
又或者買一d叫做儲值飛的飛
儲值飛我無記錯係 $50
你用儲值飛時，所扣的票價會比單程飛平少少
仲有一個最大的優惠，就係叫做尾程優惠
即係你有本事計到 $50 用左 $49.9
張飛仲有 $0.1 時，你可以用黎搭埋最後一次車
同八達通唔同，八達通最後一程後會 debit
你要自己入錢時補翻條數，但儲值飛就唔洗你咁做
最尾果程你搭去邊都得，搭埋最後一次，張飛就會 expired 左
所以好多人都會留意幾時用到剩好少錢
就留起佢用黎他日過海時用
所以初出八達通的時間，大家都好反感無左呢個著數位
呢個留飛的模式就變成了集體回憶
而當時仲有一個遊戲，叫收藏 "地鐵飛"
地鐵時不時就會出一 d 特別封面的儲值飛
美其名俾我地搭完車用曬所有裡面的錢後
可以將儲值飛收藏
但實際你會發現，儲值飛一旦使用黎過閘
佢一定會有或多或少的刮花
所以真的想收藏就只好 $50 買一張黎儲
情況都有 d 似郵票，我初中左右都好興儲郵票
果陣一套郵票大約 $10 左右
好多人儲，因為真係有升值空間
我記得一有郵票出，我就會一朝早去排
一人限買 10 套，買黎做咩？ 因為門口有人會以 $13 ~ $14 一套同你收
排一轉可以賺 三、四十蚊，一般你排唔到第3轉，
因為當時郵票發行量唔多，11點左右都一定賣曬
(唔似得而家，發行量多到賣到佛誔都未賣曬)
而我當時當然唔會即刻放，因為佢真係有升值能力
過幾個月，真係可以去大埔中心的郵票鋪賣到下錢
如果眼光好的話，一套 $10 可以賣到 $20~$30
當然而家大家眼中可能覺得呢d係碎銀
但係當時初中的我已經覺得係大生意
隨著搵到下食的緣故，我亦愈儲愈多
有好多好值得收藏 (因為發行量少)，都會幾貴
介紹幾個我買唔起的郵票俾大家聽下
中國有一個郵票叫全國山河一片紅
佢張郵票只係將中國的國土部分油紅色
本來無咩收藏價值，但係張郵票竟然油漏左台灣果個部分
呢個錯誤，中國當然不容接受，所以發售後好短的時間就叫停
市面貨源極少，所以炒到 $30000 一張
另外每年都有生肖的郵票，個個地方都會發行一個同設計的十二生肖郵票
以中國為例，佢係由猴年出起
即係 1980 ~ 1992 年的係同一個系列
1993 ~ 2004 年又係另一個同系列的出品
隨著每年都有人加入收藏行列
大多數人都會想齊一套，所以行頭的生肖就必然會係搶手貨
中國的1980年猴生肖郵票係一張毛神神的馬騮
講美觀可以話一點都沒有，但值 $500 一張
如果係版票，即係一版有好多張
而家唔記得幾多張，大約四五十左右，值成十萬計
而香港都有佢的代表
香港每隔一段時間就會有郵展的紀念票
我記得我中一時佢好似出到7號
而當時1號就已經由當時郵局賣 $10 升到 $500
好多人(包括我)見到咁都以為郵票可以點石成金
但後黎當炒到最火熱的時間
一下子所有郵票的價值大跌
當中有人講過話當時之所以炒高
係大陸有人鐘意收藏，所以掃高曬d價錢
後黎唔知咩原因，果班買手一下子無曬
所以價值就大跌，我當然都損失於呢個郵災當中......... :(

Herman Yeung


連結 Link:   Herman Yeung 的其他 Blog

連結 Link:   Herman Yeung Blog 主目錄